Moska ka hedhur poshtë çdo mundësi që forca të huaja të stacionohen në Ukrainë për të ofruar garanci sigurie, duke e cilësuar këtë një vijë të kuqe të papranueshme. Në një deklaratë, zëdhënësi i Kremlinit, Dmitry Peskov, tha se “A mund të sigurohen dhe të ofrohen garancitë e sigurisë së Ukrainës nga kontingjente ushtarake të huaja, veçanërisht evropiane dhe amerikane? Absolutisht jo, nuk munden.”
Kjo deklaratë vjen si reagim ndaj një zotimi të fundit të presidentit francez Emmanuel Macron, i cili njoftoi se 26 aleatë perëndimorë janë angazhuar zyrtarisht për të vendosur trupa “nga toka, deti ose ajri” në territorin ukrainas, në kuadër të një mbështetjeje paqeje ndaj Kievit.
Në një tjetër front të përpjekjeve për të ndalur luftën, Bashkimi Evropian dhe Shtetet e Bashkuara po thellojnë bashkëpunimin në kuadër të asaj që po cilësohet si “diplomacia e energjisë”. Synimi kryesor është reduktimi i varësisë nga energjia ruse, duke e goditur kështu aftësinë e Moskës për të financuar luftën.
Presidenti amerikan Donald Trump deklaroi se BE-ja duhet të bashkëpunojë ngushtë me SHBA-në për të ndaluar importet e naftës dhe gazit rus, duke i hequr Kremlinit burimet financiare për “makinerinë e luftës”.
Komisioneri i BE-së për energjinë, Dan Jørgensen, u shpreh se “edhe kur të kemi paqe, mendimi im është se ne prapëseprapë nuk duhet të importojmë energji nga Rusia.”
Ai gjithashtu konfirmoi se javën e ardhshme do të zhvillojë një takim me sekretarin amerikan për sigurinë energjetike, Chris Wright, për të diskutuar më tej këtë çështje.
BE-ja ka vendosur objektivin për t’i dhënë fund të gjitha importeve të naftës dhe gazit rus deri në fund të vitit 2027. Megjithëse një zyrtar i Shtëpisë së Bardhë deklaroi se Rusia ka përfituar 1.1 miliardë euro nga shitja e karburanteve në BE brenda një viti.
Këto zhvillime pritet të jenë në qendër të diskutimeve edhe në takimin e së premtes (5 shtator), ku presidenti ukrainas Volodymyr Zelenskyy do të takohet me presidentin e Këshillit Evropian, Antonio Costa, dhe kryeministrin sllovak, Robert Fico.
Sllovakia, së bashku me Hungarinë, mbetet ende thellësisht e varur nga importet e gazit rus dhe ka kritikuar vazhdimisht sulmet e Ukrainës ndaj infrastrukturës energjetike të Rusisë.
Kryeministri Fico është përballur me kritika të shumta këtë javë për ftohjen e marrëdhënieve me Brukselin, si dhe për pjesëmarrjen e tij në një paradë ushtarake në Kinë, ku zhvilloi takime dypalëshe me presidentin Xi Jinping dhe presidentin rus Vladimir Putin.
