Derisa përpjekjet për vendosjen e paqes në Ukrainë po vazhdojnë, pas takimeve të shumta të presidentit Donald Trump me palën ruse dhe aleatët europianë, Britania e Madhe është shprehur e gatshme t’i dalë në ndihmë Ukrainës edhe me trupa ushtarake, përcjell Gazeta Metro.
Sipas asaj që raporton gazeta e njohur britanike The Guardian, kreu i forcave të armatosura britanike, Tony Radakin, pritet ta njoftojë palën amerikane në Pentagon sot për gatishmërinë e Britanisë të dërgojë trupa në Ukrainë.
Gjithnjë sipas raportimeve, Radakin pritet t’ua kumtojë amerikanëve planet e Britanisë për të dërguar trupa në Ukrainë, por jo për t’i vendosur shumë afër kufirit me Rusinë.
Po ashtu, mendohet se Radakin do t’i njoftojë amerikanët se ushtria britanike është e gatshme ta mbrojë qiellin e Ukrainës dhe sigurinë në det, duke ndihmuar po ashtu në ndërtimin e ushtrisë ukrainase pas luftës.
Në takimin që presidenti Trump pati me presidentin Zelensky, amerikani tha se SHBA-ja do të ndihmojë në garancat e sigurisë për Ukrainën. Një ditë më vonë, ai njoftoi se trupat amerikane nuk do të vendosen në Ukrainë, por se SHBA-ja do të ndihmojë në mënyra tjera.
