Pezullimi i pagesës së radhës, bazuar në informacionin fillestar të dhënë nga Zyra Evropiane Kundër Mashtrimit [OLAF], pas një hetimi mbi akuzat për korrupsion në lidhje me zbatimin e programit IPARD II, ka qenë objekt debati të enjten edhe në Kuvend mes opozitës dhe ministres së Bujqësisë, Frida Krifca.
Ministrja, në përgjigje të akuzave të opozitës për “korrupsion qeveritar”, deklaroi nga foltorja e Kuvendit se AZHBR ka qenë nën hetim që në 2021, dhe se në asnjë deklaratë të Komisionit, nuk është përmendur fjala korrupsion.
“U përballa që dje me rotorika, të cilat synonin të hidhnin baltë mbi institucionin dhe punonjësit e përkushtuar. Lajmin se AZHBR ka qenë nën hetim, është bërë publik që në shkurt të 2021. I vetmi lajm ka qenë njoftimi për pezullimin e pagesës së radhës, si një masë e përkohshme nga Drejtoria e Përgjithshme e Bujqësisë në Bruksel”- deklaroi Krifca para deputetëve.
Ministrja Krifca deklaroi se AZHBR ka një transformim shumë të madh që kur PS ka ardhur në pushtet dhe, sipas saj, “asnjë cent nuk është shpërdoruar nga fondet”.
“I gjithë fondi është vënë në funksion të Shqipërisë. Nuk ka asnëj cent të djegur nga ky program. Dembelizmi juaj dhe i koalicionit tuaj ‘Bashkë Shpifim’, nuk i ndan fermerët.
AZHBR-ja dikur ishte një kënetë që qelbte. Në kohën e PD konsiderohej si harem, kurse për LSI-në funksiononte si “hambar i partisë”. Tani agjencia, është transformuar tërësisht. E kemi bërë një institucion model”- deklaroi ministrja.
Sipas saj, sistemi i menaxhimit të fondeve dhe procedura e ndjekur nga AZHBR-ja, janë pikërisht ato për të cilat është akredituar nga BE-ja.
“Nëse këto procedura të verifikuara nga jashtë brenda janë cënuar, ose nëse zhvillimet e ndryshme imponojnë përmirësimin e tyre, jemi të interesuar për të bashkëpunuar edhe me OLAF, për të korrigjuar veprimtarinë e institucionit.”- theksoi ministrja.
Sipas saj, programi nuk është ndaluar, ai vijon të jetë në funksion.
