Presidenti i Francës, Emmanuel Macron ka folur sot në Tiranë lidhur me dialogun Kosovë-Serbi.
Në konferencën për media me kryeministrin e Shqipërisë, Edi Rama, Macron u pyet nga gazetarët lidhur me kritikat e presidentes Vjosa Osmani për qasjen e Bashkimit Evropian ndaj Kosovës.
“Udhërrëfyesi është shumë i qartë dhe kemi kaluar shumë kohë me dialogun Kosovë-Serbi…Mendoj se ‘ekzigjenca’ nuk është humbje besueshmërie, duhet të dilet nga kjo përballje që bllokon situatën. Unë uroj që javët e ardhshme të rifillojmë dialogun edhe me Prishtinën, edhe me Beogradin sepse secili vend është përballur me vështirësi politike dhe sociale për të mundur të bëjmë avancimin. Është e rëndësishme për gjithë rajonin”, tha presidenti francez.
Sipas presidentit francez, Bashkimi Evropian është legjitim për të kërkuar që të ketë avancime konkrete mbi çështjen politike, mbi zgjedhjet e komunave që nuk kanë qenë sipas tij të kënaqshme, për çështjet e sigurisë.
“Nuk duhet lëmë të vendoset një dialog të tërthortë, nuk është mënyra korrekte për të avancuar… Për sigurinë e Evropës, për bashkimin e saj duhet të bëjmë këtë udhë… Është legjitime të kemi ekzigjenca për këtë gjë”, tha tutje Macron.
Presidenti francez tutje shtoi se nuk është kurrë ide e mirë “kur mundohemi t’i përçajmë linjat ose ta vëmë në dyshim procesin”.
“Pra, do të vazhdojmë të ecim me forcë, do të riangazhojmë…ne do të shkojmë krah partnerëve tanë evropianë në mënyrë që gjërat të avancojnë në Kosovë”, tha ai.
Pjesën ku Macron flet për dialogun Kosovë-Serbi mund ta ndiqni nga minuta 25:06.
