Sipas një hulumtimi, gati 18 mijë persona që vuajnë nga kanceri në Angli mund të vdesin pasi kriza e koronavirusit i ka detyruar spitalet që ta pezullojnë trajtimin e këtyre pacientëve dhe i ka bërë ata që të ngurrojnë për të kërkuar ndihmë në institucionet shëndetësore.
Ekspertët e kancerit pretendojnë se 6,270 persona në Angli, të cilët janë diagnostikuar së voni me kancer, mund të vdesin nga kjo sëmundje gjatë 12 muajve të ardhshëm si rezultat i drejtpërdrejtë i pengesave të shkaktuara nga koronavirusi.
Kjo shifër paraqet rritje prej 20 për qind të rreth 90 mijë vdekjeve nga kanceri që shënohen çdo vit në Angli, në bazë të statistikave më të reja, shkruan “The Guardian”, transmeton Gazeta Express.
Analiza e re hodhi dritë mbi ndikimin më të gjerë shëndetësor që do ta ketë pandemia. Qendra për Përkrahje kundër Kancerit “Macmillan” i përshkroi këto gjetje si jashtëzakonisht shqetësuese dhe tha se kanceri nuk duhet të jetë në harresë gjatë krizës së koronavirusit.
Organet shëndetësore në Angli e kanë filluar një fushatë për t’u bërë thirrje të gjithë personave që kanë simptoma të sëmundjeve serioze që të kërkojnë ndihmë në mënyrë normale nga spitalet ose duke telefonuar në numrin 999.
Që nga muaji shkurt, referimet për testime për kancer kanë rënë për 76 për qind, ndërsa terminet për kimioterapi janë ulur për 60 për qind. Sidoqoftë, mjekët thonë se trajtimi i kancerit duhet të vazhdojë normalisht dhe pa u ndikuar nga kriza e pandemisë.
