Kryeministri kroat, Andrej Plenkoviç dhe ministrja austriake për Çështjet Europiane, Karoline Edtstadler deklaruan se vendet e tyre do të kërkonin hapjen e negociatave të anëtarësimit me Shqipërinë dhe Maqedoninë e Veriut në nivel të Këshillit Europian marsin e ardhshëm.
Në një njoftim për shtyp, të lëshuar nga qeveria kroate pas bisedimeve Plenkoviç-Edtstadler, në Zagreb, thuhet se të dy vendet do të nxisin miratimin e një vendimi për fillimin e negociatave me dy aspirantët në nivel të Këshillit Europian gjatë samitit të 26-27 marsit.
Plenkoviç e informoi ministren austriake për axhendën e presidencës kroate të BE-së dhe përparësitë e saj.
Duke marrë parasysh miratimin e buxhetit shumëvjeçar të BE-së, Plenkoviç bëri thirrje për marrëveshje, e cila gjithashtu do të merrte parasysh të gjitha specifikat e secilit shtet anëtar.
Edtstadler tha se ”Vjena mbështet aktivitetet e Kroacisë për përgatitjet e takimit të samitit të BE-së dhe vendeve të Europës Juglindore”, në fillim të majit në Zagreb.
