Pasi ka dalë nga mbledhja me kryedemokrati Lulzim Basha, kryetari i degës së PD-së së Vlorës, Genc Deromemaj ka pohuar pjesëmarrjen e tij në Kuvendin e Berishës më 11 dhjetor.
Ai në një prononcim për media tha se ai ka pasur kundërshtitë lidhur me vendimet e Lulzim Bashës dhe kryesisë për Kuvendin Kombëtar.
Ai shtoi se nuk është kërcënuar, por Basha u ka thënë se mund ta ushtrojë të drejtën e tij për të marrë masa për çdokënd që nuk do të zbatojë porositë apo vendimet e Kryesisë.
“Mbledhja u zhvillua në lidhje me Kuvendin e thirrur nga Kryesia e PD për datën 18 dhjetor. Ky Kuvend tashmë është zgjidhur dhe vendimin e kanë marrë delegatët me të drejtë vote në gjithë Shqipërinë. Diskutimet e tjera nuk kanë vlerë. Kjo sepse vendimi i delegatëve prevalon mbi çdo lloj strukturë tjetër organizative në PD. Nuk jemi kërcënuar, por kryetari na tha se mund ta ushtrojë të drejtën e tij për të marrë masa për çdokënd që nuk do të zbatojë porositë apo vendimet e Kryesisë. Nëse përjashtimi im i mundshëm apo kolegëve të mi do të sjellë të mirën e PD-së, le të bëhet. Unë do shkoj në Kuvendin e thirrur nga delegatët, që punojnë në degët tona”, tha ai.