Kryebashkiaku i Liverpoolit, Joe Anderson është kundër rifillimit të Premier Leagues dhe ai i druhet një situate absurde me tifozë duke u mbledhur jashtë stadiumit “Anfield”, edhe nëse Liverpooli siguron titullin e Anglisë në një fushë neutrale, shkruan BBC.
Premier League ka njoftuar se vetëm “stadiumet e aprovuara” do të përdoren nëse rifillon kampionati, duke rritur mundësinë që ndeshjet të luhen në fusha neutrale.
Liverpooli, që është shumë afër titullit të parë të Anglisë në 30 vjet, kryeson me 25 pikë epërsi, kur kanë mbetur edhe nëntë xhiro deri në fund. Liga shpreson të rifillojë më 8 qershor.
Po ashtu ndeshjet do të luhen pa shikues.
“Edhe nëse është pa shikues, do të ketë mijëra njerëz që do të mblidhen jashtë ‘Anfieldit’. Nuk ka shumë persona që do të respektojnë atë që kemi thënë dhe të qëndrojnë larg fushës. Shumë njerëz do të vinin të festonin, kështu që mendoj se do të ishte më mirë të mos vazhdohej”, ka thënë Anderson për BBC.
I pyetur nëse do të ndihmonin ndeshjet në fushat neutrale, ai ka shtuar: “Edhe atëherë, them se shumë njerëz do të vinin jashtë ‘Anfieldit’ për të festuar dhe e kuptoj shqetësimin e policisë, është një vështirësi e madhe për ne këtu. Mendoj se do të jetë vërtetë e vështirë për policinë që të mbajë larg njerëzit dhe të mbajë distancën sociale, nëse do të festohet jashtë Anfieldit. Do të ishte situatë absurde. Është e vështirë për ne që të ndalim tubimin e njerëzve në parqe kur moti është i mirë, veçanërisht të rinjtë. Dhe frikësohem se njerëzit do të na injorojnë. Policia ka të drejtë të shqetësohet pasi ne jemi këtu në qytet, dhe zyrtarët e shëndetit publik po ashtu janë të shqetësuar. Kështu që i kërkoj Premier Leagues dhe qeverisë të marrë në konsideratë gjitha këto shqetësime që kemi.
Ai thotë se opsioni më i mirë është të mos vazhdohet stinori e Liveprooli të shpallet kampion.
“Mendoj se gjëja më e mirë është të mos vazhdohet ky stinor. Liverpooli duhet të shpallet kampion, pasi e meriton këtë, e ka fituar qartë ligën. Por, nuk ka të bëjë me këtë. Gjëja më me rëndësi është shëndeti dhe siguria, jetët e njerëzve. Mendoj se futbolli duhet të jetë dytësor në këtë aspekt”, ka thënë Andersen.
Më tepër se 300 persona kanë vdekur nga koronavirusi në spitalet e Liverpoolit.
