Kryebashkiaku i Londrës, Sadiq Khan sot u bëri thirrje ligjvënësve që misogjininë ta shpallin krim urrejtjeje, transmeton Anadolu Agency (AA).
Duke u shfaqur në programin ITV’s Good Morning Britain, Khan e përshkroi dhunën që synon gratë dhe vajzat si një “epidemi”.
“Mes Ditës Ndërkombëtare të Gruas të vitit të kaluar dhe Ditës Ndërkombëtare të Grave të këtij viti, 180 gra u vranë nga duart e burrave në të gjithë vendin”, tha Khan.
“Ne kemi një epidemi kur bëhet fjalë për dhunën kundër grave dhe vajzave”, tha ai.
“Vajzat në moshë të re po ndryshojnë mënyrën e veshjes gjatë rrugës për në shkollë për shkak të mënyrës se si trajtohen nga djemtë. Mendoj se ne duhet ta bëjmë misogjininë një krim urrejtjeje. Mendoj se ngacmimi në hapësirën publike kundër grave duhet të jetë vepër penale”, shtoi Khan.
Ndërhyrja e Khan erdhi pas vrasjes së një mësuese të shkollës fillore fundjavën e kaluar.
Sabina Ness, 28-vjeçare, u sulmua teksa po bënte një ecje 5-minutëshe nga shtëpia për të takuar miqtë e saj mbrëmjen e së premtes.
Trupi i saj u gjet pranë qendrës së komunitetit OneSpace në Kidbrooke Park Road në Greenwich të shtunën, gati 24 orë pas vrasjes.
Në korrik, qeveria britanike lëshoi një strategji për të luftuar dhunën kundër grave dhe vajzave, duke premtuar shërbime më të mira mbështetëse për komunitetet minoritare dhe një fushatë të shëndetit publik për t’u përqendruar në sjelljen e dhunuesve.
