Kryetarja e LSI, Monika Kryemadhi ishte sot në Fier – Shegan të Lushnjes, ku prezantoi kandidatin për deputet, Etnor Krakulli.
“Ne e dimë shumë mirë që i gjithë qarku i Fierit, sidomos këtu ku jemi sot në Fier – Shegan një nga problemet më të mëdha që ka është largimi i të rinjve dhe të rejave, bujqësia dhe mungesa e investimeve për infrastrukturën, ujin, kanalizimet, rrugët dhe i gjithë procesi i shitjes së prodhimeve të zonës”, tha Kryemadhi.
“Edhe kandidimi i Norit në listën e LSI-së ka të bëjë me përfshirjen dhe angazhimin që ne duhet të marrim në zona të caktuara. Ne si LSI na ka favorizuar jashtëzakonisht Kodi i ri Zgjedhor, sepse e ka bërë të mundur drejtpërdrejt pikën e kontaktit të njerëzve me zonën. Ndryshe nga partitë e tjera, ne këtu e kemi të shtrirë individin dhe përfaqësimin drejtpërdrejt me njerëzit e zonave të caktuara”, theksoi ajo.
“Si LSI ne angazhohemi në shumë gjëra, por kemi pesë prioritetet tona kryesore, që kanë të bëjnë jo vetëm me ekonominë dhe formalizimin e ekonomisë, por edhe me Kartën e Fermerit, që është një nga pikat tona kryesore, një nga pesë prioritetet tona. Kjo kartë ka të bëjë me çështjen e plehrave kimike, çështjen e ndihmës që duhet ti japim fermerit. Ke produkte vendase. Ne themi që duhet të konsumojmë prodhimet tona”, shtoi Kryemadhi.
“Të gjithë prodhimet tona, të cilët janë bio dhe shumë të mira, por me politikat që ka ndjekur sot qeveria, prodhimet vendase janë më të shtrenjta se ato të importit, sepse ne favorizojmë oligarkët, importuesit dhe nuk favorizojmë fermerin shqiptar, për të ulur çmimin e plehrave kimike, për të ulur çmimin e naftës, për të krijuar infrastrukturën e nevojshme për kanalet kulluese, kanalet vaditëse, rrugën për të shkuar deri në arë apo në vendin e punës e deri tek subvencionet që vijnë në bujqësi”, u shpreh ajo.
“Të gjithë shqiptarët kërkojnë prodhim vendas, me pleh organik, prodhime bio, por kur vjen puna, për arsye të varfërisë, të mungesës së fuqisë ekonomike, shqiptarët shkojnë dhe blejnë prodhime importi, sepse janë shumë më të lira se prodhimet vendase. Kjo sepse qeveria subvencionon importin, i krijon mundësinë që të hyjnë pa doganë, ndërkohë që prodhimet tona i shkatërron”, shtoi Kryemadhi.
