Kryetarja e LSI-së, Monika Kryemadhi paralajmëroi sot publikimin e fakteve të tjera jo vetëm nga institucionet dhe zyrtarët e shtetit, por dhe evazionin fiskal që kompani të ndryshme kanë bërë duke përdorur inceneratorët.
“Vetë situata politike qoftë me arrestimin e Lefter Kokës do të vendosë në një provë vetë institucionin e SPAK-ut, nëse do të qëndrojnë deri këtu ku është dhe ka qenë thjesht për efekt të situatës politike në të cilën gjendet vendi, apo do të vazhdojnë më tej. Sepse në gjithë dosjen e inceneratorëve, ne akoma nuk kemi bërë prezent evazionin fiskal. Deri tani kemi bërë prezent në opinionin publik shkeljet ligjore që kanë ndodhur nëpërmjet firmave e vulave të shtetit shqiptar”, tha ajo në një studio televizive.
Kryemadhi tha se “ne nuk jemi marrë në pyetje nga SPAK, sepse padia ka qenë shumë e qartë dhe dorëzimi i dokumenteve po ashtu”. “Por kemi vazhduar të dorëzojmë dhe të çojmë dokumente të tjera që kanë të bëjnë lidhje me evazionin fiskal që është akoma më i rëndë. Prandaj dua të them që laku i inceneratorit sa vjen dhe ngushtohet”, tha ajo.
Kryemadhi tha se skema e inceneratorëve dhe transferimi i parave në kompani offshore ka zgjuar interesin jo vetëm të SPAK, por dhe të institucioneve të tjera të huaja dhe ndërkombëtare për të zbuluar se ku dhe si kanë lëvizur miliona euro. “E gjithë skema e transferimit të parave në offshore është e bazuar në inceneratorin e Tiranës”, tha Kryemadhi.
Kryemadhi tha se Klodian Zoto, pronari i kompanisë që ka inceneratorin e Tiranës, Elbasanit dhe Fierit i ka shkaktuar shtetit shqiptar një dëm financiar prej 27 milionë eurosh.
Ky dëm, sipas Kryemadhit, ka ardhur si pasojë e evazionit fiskal të shkaktuar nga kompanitë e Zotos, një dëm i cili deri më sot nuk është derdhur në zyrat e tatimeve.
