Kryetarja e LSI, Monika Kryemadhi zhvilloi një takim me gratë në Ersekë.
Gjatë fjalës së saj, ajo u shpreh se, LSI është partia që e mban fjalën dhe s’ka borë, stuhi apo shi që e ndal.
“LSI është një parti që e mban fjalën e saj dhe nuk ka as shi, as bori e as stuhi që na ndal, e aq më tepër presionet e pushtetarëve këtu. Vajza e madhe e Arben Malos është inxhiniere elektronike, është e jashtëzakonshme në Angli, me rezultate të shkëlqyera dhe do të ishte një mrekulli nëse ajo do të kthehej dhe do të punonte në Shqipëri. Ne prandaj do të punojmë fort që të kthejmë gjenet tona, të mos na ikin nëpër botë. Ti kthejmë fëmijët tanë të shkollohen këtu, të punojnë këtu, të ushtrojnë këtu profesionin e tyre me të njëjtën pagë me të cilën punojnë dhe jashtë vendit. Dhe ne e kemi këtë shans.
Ndaj, unë do t’ju ftoja që të punojmë çdo ditë me njerëzit tanë, me familjarët tanë, të shkojmë të trokasim shtëpi më shtëpi, derë më derë, në mënyrë të tillë që ti çojmë njerëzit më 25 prill në kutinë e votimit. E për këtë të jeni të bindur që do të na përgjigjen të gjithë, e më shumë socialistët, të cilët do ta dënojnë me votë, sepse ata nuk pranojnë dot tjetërsimin e vlerave dhe të historisë së tyre”, tha kryetarja e LSI.
Më tej, Kryemadhi shtoi se Edi Rama goditjen më të madhe më 25 prill do ta marrë nga vetë socialistët e zhgënjyer.
“Një nga dhimbjet më të mëdha të socialistëve është pikërisht braktisja që po i bën baza e Partisë Socialiste. Pse ndodh kjo? Unë kam takuar shumë socialistë në Fier. Edhe dje në Korçë ne ishim në një familje socialiste dhe ata shpërthejnë më shumë se ç ‘shpërthejmë ne. Qëndrueshmëria e më shumë se 30 viteve e socialistëve që kanë qenë studentë e që sot janë gjyshër, u ka ndodhur që iu kanë tjetërsuar punën, kontributet, identitetin, vlerat dhe normalisht njerëzit e kuptojnë që vjen një njeri dhe fshin historinë e mbi 30 viteve të një partie politike. Pra, socialistëve u ka ndodhur një braktisje në masë.
Dhe unë mendoj që goditjen më të madhe do ta marrë nga socialistët e tij, por ne nuk do të gëzohemi nga kjo. Ne duhet të përgatitemi të bëjmë gati një Shqipëri anëtare të Bashkimit Evropian me dinjitet, me integritet. Një anëtare e BE-së me djemtë dhe vajzat tona që jetojnë, punojnë këtu si evropianë të vërtetë”, u shpreh Kryemadhi.
