Kryetarja e LSI, Monika Kryemadhi e ftuar në një emision televiziv, ka folur mbi vendimin për djegien e mandateve.
Ajo tha se vendimi është marrë nga strukturat e LSI si kryesia dhe Komiteti Drejtues dhe se nuk kthehej më pas. Djegia e mandateve sipas Kryemadhit tregoi fytyrën e vërtetë të qeverisë dhe zhbëri propagandën e saj.
“Shikoj që paska filluar dashuria e hershme e Luan Ramës me Ilir Metën, që kur kanë qenë në PS të dy bashkë. Unë aty kam qenë, por nuk kthehem pas. Ka një vendim shumë të qartë të kryesisë së LSI, të strukturave, Komitetit Drejtues, që është një vendim i pakthyeshëm për shkak të djegies së mandateve dhe i qëndrojmë asaj”, u shpreh ajo.
“Nëse ne nuk do të kishim bërë një vendim të tillë, që është një veprim radikal, që i kushtoi pak qetësisë së presidentit, mediave, sepse mediat u detyruan të ishin nën dhunën dhe blerjen e Bashkisë së Tiranës apo të departamentit të mediave të kryeministrit, i kushtoi pak biznesit shqiptar, sepse duhej të faleshin tek oligarkët dhe të paguanin haraçet tek zyrat e tatimeve të qeverisë”, tha Kryemadhi.
“Mos të harrojmë që momentin kur opozita ka djegur mandatet Shqipëria kishte 5 kushte për hapjen e negociatave dhe tashmë ajo ka 15 kushte, ku një nga kushtet kryesore është krimi elektoral. Dua ta them këtë që ndoshta e ka bërë të vështirë djegia e mandateve dhe mospjesëmarrja në zgjedhjet lokale, punën e opozitës, punën e biznesve, punën e një njeriu që fokusohet vetëm te imazhi i tij, nuk arrin të menagjojë krizën e tërmetit apo pandemisë dhe ndoshta kjo ka krijuar një lloj deziluzionimi tek njerëz që e shikojnë me qetësi politikën, por ajo që dua të theksoj është se djegia e mandateve ishte një vendimet më të mira për të krijuar një qetësi tek njerëzit dhe për të parë që opozita nuk ishte fasadë dhe palë e Edi Ramës dhe Rilindjes”, tha ajo.
Në lidhje me një bashkëpunim me kryeministrin Edi Rama, kryetarja e LSI, Monika Kryemadhi e përjashtoi totalisht këtë mundësi.
