Duke folur në ditën e parë të bllokimit të ri kombëtar, Johnson tha se “sfidat me të cilat përballemi janë të rëndësishme në të gjithë Mbretërinë e Bashkuar”
Kryeministri britanik, Boris Johnson, në një konferencë për media ka deklaruar se ka “dritë në fund të tunelit”, duke iu referuar kufizimeve të reja për të frenuar koronavirusin e ri (COVID-19).
Duke folur në ditën e parë të bllokimit të ri kombëtar, Johnson tha se “sfidat me të cilat përballemi janë të rëndësishme në të gjithë Mbretërinë e Bashkuar”, duke shtuar se katër javët e bllokimit të ri janë “të mjaftueshme për të bërë një ndikim të vërtetë”.
“E di sa e vështirë është kjo për njerëzit, që janë të shqetësuar dhe të lodhur”, u shpreh Johnson, duke theksuar se bllokimi i ri nuk do të jetë një përsëritje e pranverës kur bllokimi u zgjat për shkak të numrit të lartë të vdekjeve dhe infeksioneve.
Johnson tha se qeveria ka në plan të kthehet “në sistem” pas 2 dhjetorit, ditën kur bllokimi do të përfundojë.
“Sot ne po njoftojmë edhe 15 milionë paundë për të ndihmuar këshillat që ofrojnë strehim të sigurt për njerëzit që rrezikojnë të bëhen të pastrehë. Ky program do të ndihmojë zonat që kanë më shumë nevojë për mbështetje shtesë gjatë kufizimeve dhe gjatë gjithë dimrit”, tha ai.
Kancelari i Thesarit, Rishi Sunak, tha se skema e trafikut, e cila paguan 80 për qind të pagave të njerëzve, do të mbetet në fuqi deri në fund të muajit mars, me një rishqyrtim në muajin janar.
Ndërkohë, sekretari i transportit, Grant Shaps, njoftoi se Mbretëria e Bashkuar ka hequr Suedinë dhe Gjermaninë nga e ashtuquajtura lista e saj e Korridorit të Udhëtimit.
“Nga e shtuna, 7 nëntor, nëse arrini në Mbretërinë e Bashkuar nga këto destinacione, do të duhet të izoloheni. Të gjithë udhëtarët që mbërrijnë duhet të plotësojnë një formular të lokalizimit të pasagjerëve pas mbërritjes”, shkroi Shaps në Twitter.
Autoritetet britanike të shëndetësisë së fundmi raportuan 24.141 raste të reja të koronavirusit, duke e çuar totalin në 157.860. Po ashtu u regjistruan 378 viktima të reja, duke e çuar totalin në 48.117.
Në ditën e parë të karantinës u organizuan protesta kundër, ku në Londër u arrestuan 104 persona. Policia e Londrës njoftoi se përderisa turmat filluan të tubohen, policia i paralajmëroi të shkojnë në shtëpitë e tyre.
“Operacionet e policisë vazhdojnë dhe ne presim që numri i arrestimeve të rritet”, tha policia në njoftimin e saj.
