”Një luftë tregtare Britani e Madhe- BE do të ishte “tronditëse” dhe “e panevojshme”, tha kryeministri irlandez Micheal Martin.
Ai i bëri thirrje qeverisë së Mbretërisë së Bashkuar të negociojë” mbi ndryshimet në marrëveshjet tregtare pas Brexit për Irlandën e Veriut.
Taoiseach tha për BBC se Irlanda dhe Bashkimi Evropian “nuk duan një luftë tregtare” me Mbretërinë e Bashkuar.
Qeveria javën e kaluar njoftoi planet për të anashkaluar pjesët kryesore të marrëveshjes së Brexit brenda disa javësh.
Qeveria e Boris Johnson ra dakord për marrëveshjen tregtare me BE-në në vitin 2019 pasi Britania e Madhe votoi për t’u larguar nga blloku.
Në rast se Britania e Madhe braktis në mënyrë të njëanshme elementet e rënë dakord të marrëveshjes që krijojnë pengesa në tregtinë e mallrave midis Britanisë së Madhe dhe Irlandës së Veriut, BE-ja ka fuqinë të pezullojë pjesë të të gjithë marrëveshjes tregtare pas Brexit.
Kur u pyet në Forumin Ekonomik Botëror në Davos nëse BE-ja po hartonte plane për të aplikuar tarifa për eksportet e ndjeshme politikisht të Mbretërisë së Bashkuar, Martin u shpreh:
“Për momentin unë thjesht po them dhe vazhdimisht se qeveria e Mbretërisë së Bashkuar dhe BE duhet të negociojnë’.
I pyetur se pse në këtë kohë të rritjes së inflacionit BE-ja po mendonte një lëvizje të tillë, kryeministri irlandez tha se vetëm Mbretëria e Bashkuar po bënte kërcënime.
“E vetmja lëvizje e njëanshme që është bërë këtu ka qenë nga qeveria e Mbretërisë së Bashkuar, e cila ka kërcënuar të prishë një marrëveshje ndërkombëtare të nënshkruar me Bashkimin Evropian,” tha ai.
“Ky është kërcënimi i vetëm këtu. Dhe kjo është ajo që ka ndodhur.”
