Kryeministrja e Zelandës së Re, Jacinda Ardern e ka ruajtur gjakftohtësinë gjatë tërmetit që goditi Wellingtonin të dielen, teksa ajo po intervistohej nga një kanal televiziv.
Ardern, që u bë kryeministre më 2017, është tejet e popullarizuar në Zelandën e Re, për mënyrën se si është përballur me disa kriza – prej sulmit në dy xhamitë e Christchurchit gjatë vitit të kaluar, e deri tek pandemia e koronavirusit.
Wellingtoni dhe zonat përreth janë tronditur prej një tërmeti prej 5.8 ballësh të Rihterit, epiqendra e të cilit ka qenë rreth 30 kilometra në veriperëndim të Levinit, një qytet afër kryeqytetit, sipas Geonet.
“Kemi pak tërmet këtu, Ryan…”, i ka thënë Ardern prezantuesit të emisionit Ryan Bridge, teksa gjërat përreth dridheshin.
