Kryebashkiaku i kryeqytetit të Kanadasë, Ottawa, ka shpallur gjendjen e jashtëzakonshme në përgjigje të protestave më shumë se një javore të shoferëve të kamionëve kundër kufizimeve të vendosura për shkak të Covid-19.
Sipas mediave të huaja, Jim Watson tha se qyteti ishte “plotësisht jashtë kontrollit”.
Ai tha se protestat përbënin një kërcënim për sigurinë e banorëve.
Ndryshe, kamionistët kanë paralizuar qendrën e Otavës me automjete dhe tenda që bllokojnë rrugët.
“Konvoji i Lirisë” filloi si një lëvizje kundër një kërkese të qeverisë që kamionistët të vaksinohen kundër Covid-19.
Duke folur për radiostacionin kanadez CFRA, Watson tha se protestuesit po silleshin gjithnjë e më “të pandjeshëm”, [duke ndezur] fishekzjarrë dhe duke e kthyer atë në një festë”.
Kryebashkiaku nuk dha detaje specifike se çfarë masash mund të vendosë, por policia tha të dielën se do të forconte zbatimin e ligjit, duke përfshirë arrestimet e mundshme të atyre që kërkonin të ndihmonin protestuesit.
Kështu, një gjendje e jashtëzakonshme do t’i japë qytetit kompetenca shtesë, duke përfshirë qasjen në pajisjet e kërkuara nga punonjësit e vijës së parë dhe shërbimet e urgjencës.
Ndërkohë një deklaratë nga autoritetet e qytetit tha se gjendja e jashtëzakonshme “pasqyron rrezikun dhe kërcënimin serioz për sigurinë e banorëve të paraqitur nga demonstratat në vazhdim dhe thekson nevojën për mbështetje nga juridiksione dhe nivele të tjera të qeverisjes”.
Sipas të dhënave, kanadezët janë gjerësisht mbështetës të vaksinimit – me gati 83% e popullsisë së kualifikuar që është plotësisht e vaksinuar.
