Gazment Bardhi nuk do të jetë më anëtar i Partisë Demokratike. Kryesia e PD-së, në mbledhjen e zhvilluar të hënën në mbrëmje ka vendosur të përjashtojë ish- sekretarin e Përgjithshëm nga rradhët e demokratëve.
“Vendimi i Kryesisë së PD erdhi pas shkeljeve të njëpasnjëshme të kryera nga ish-sekretari i Përgjithshëm ndaj vendimeve të organeve kolegjale të PD-së, shumë prej të cilave janë votuar dhe janë nënshkruar prej tij, si dhe për veprime në kundërshtim me interesat politike dhe elektorale të PD-së, për mosnjohjen e institucioneve të dala nga vota e demokratëve,” thuhet në vendim.
Kryesia e argumenton vendimin për përjashtim me pretendimin se Bardhi ka punuar kundër aleatëve strategjik të PD-së, duke bashkëpunuar me persona që janë sanksionuar nga SHBA-ja si ‘non grata’.
“Bardhi ka ndjekur një agjendë personale, përmes të cilës ka kërkuar të zhvendosë PD nga orientimi i përcaktuar nga Kuvendi dhe Këshilli Kombëtar, në raport me aleatët strategjikë dhe bashkëpunimin me individët e sanksionuar si ‘non grata’, që kanë ndërmarrë një aksion dy vjeçar kundër Partisë Demokratike,” thuhet në vendim.
