Lulzim Basha dhe Gjergj Hani janë 2 kandidatët zyrtar për të marrë drejtimin e Partisë Demokratike në zgjedhjet që priten të mbahen në 29 korrik.
Në mbledhjen e sotme, Kryesia i dha dritën jeshile këtyre 2 emrave që kërkojnë të marrin drejtimin e kësaj force politike, e cila nuk ndodhet në ditët e saj të mira, e përçarë në më shumë se 2 pjesë. Në deklaratën zyrtare pas marrjes së vendimit, Kryesia tha se ky është një moment vendimtar për PD, teksa u bëri thirrje të gjithë demokratëve që të jenë pjesë e këtij procesi.
“Miratimi i kandidaturave për pozicionin e Kryetarit të Partisë Demokratike shënon një moment vendimtar për familjen tonë politike. Në prag të çeljes së garës, ne ftojmë çdo demokrat të jetë pjesë aktive e saj dhe e procesit të riorgnizimit, nëpërmjet të cilit do të ngrihemi në lartësinë e vlerave dhe aspiratave mbi të cilat Partia Demokratike u themelua në Dhjetor të vitit 1990, si forca e parë pro-perëndimore dhe si shpresa e shqiptarëve për ndryshim”, thuhet në deklaratë.
Në mbledhje morën pjesë 17 anëtarë, 14 në sallë dhe 3 online, teksa ra në sy mungesa e Gazment Bardhit dhe një pjese të konsiderueshme të deputetëve. Nisur nga kjo, Kryesia e ka cilësuar si të papranueshëm qëndrimin bojkotues.
“Nisur nga zhvillimet e fundit brenda forcës sonë politike, Kryesia e Partisë Demokratike e vlerëson të papranueshëm qëndrimin bojkotues të disa prej anëtarëve të saj dhe fton secilin prej tyre të vetëpërmbahet nga ngritja e pretendimeve të pabaza që dëmtojnë interesat e familjes sonë politike. Ne ftojmë çdo anëtar të Kryesisë së Partisë Demokratike të jetë pjesë e jetës institucionale dhe t’i japë zë çdo shqetësimi që mund të ketë brenda mandatit me të cilin është ngarkuar nga anëtarësia.
Mosnjohja e institucioneve, pretendimet mediatike të pabaza dhe akuzat e pamotivuara nuk ndihmojnë procesin e riorganizimit dhe shfokusojnë përpjekjet e përbashkëta për t’u dhënë demokratëve dhe shqiptarëve një opozitë të fortë dhe një alternativë qeverisëse të denjë për sfidat e Shqipërisë”, përfundon deklarata.
Ky proces ka ndezur një përplasje të re brenda Partisë Demokratike zyrtare. Bardhi dhe një sërë deputetësh janë kundër që zgjedhjet të zhvillohen së shpejti pasi janë të mendimit që ky proces duhet të nisë nga baza dhe më pas të vijojë në krye. Mirëpo, Kryesia ka qenë e mendimin që kryetari i ri duhet të zgjidhet sa më shpejt.
Morëm pjesë në mbledhje
Enkelejd Alibeaj
Indrit Sefa
Fitim Zekthi
Flutura Açka
Kreshnik Çollaku
Gazmend Koduzi
Xhemal Gjunkshi
Endri Hasa
Gentian Gaba
Jemin Gjana
Taulanda Jupi
Taulant Zeneli
Roland Bejko
Arber Agalliu
Online
Orjola Pampuri
Merita Bakiu
Agron Kapllanaj
