Kryetari i PD-se Sali Berisha ka lëshuar një tjetër akuzë të fortë ndaj qeverisë Rama dhe drejtësisë, duke i quajtur “narkoqeveri” dhe “narkodrejtësi” institucionet që raportuan dje në komisionet parlamentare.
Në një deklaratë për mediat, Berisha falënderoi deputetët e opozitës për angazhimin dhe për “autopsinë” që i bënë institucioneve të drejtësisë, të cilat sipas tij janë “armike të egra të pluralizmit” dhe “më të korruptuarat në Europë”.
“Ju i patë vetë, mëkatarët qëndronin si mjeranë para drejtuesve të organeve të drejtësisë, që janë bashkëpunëtore në krime. Flas për drejtuesit, se ka edhe njerëz të ndershëm që përpiqen, por nuk ia dalin dot”, tha Berisha.
Ai përmendi emra konkretë, duke akuzuar Ulsi Manjën dhe Fatmir Xhafajn për lidhje me dosje hetimore dhe interesa të fshehura. “Ulsiu ka dosjen tek Altin Troplini. Jo vetëm për tokat që keni dëgjuar, por për disa çështje. Prandaj i dridhej trupi sa herë ia hidhte sytë. Ndërsa Fatmiri ka bllokuar ligjin antimafia”, tha Berisha.
Më tej, ai ironizoi deklaratat e kreut të SPAK, Altin Dumani, i cili kishte folur për sekuestrime prej 60 milionë eurosh. “Troplini rrahu gjoksin se ka sekuestruar 60 milionë euro. Po çfarë janë 60 milionë euro? Vetëm familja Xhafaj i ka aq! Dhe për më tepër, nuk preku asnjë qindarkë nga ata”, u shpreh Berisha.
Ai përmendi edhe rastin e biznesmenit Redi Molla, duke thënë se “është liruar sepse është djali i teto Ollgës, shumë e dashur për Linda Ramën”.
Në fund të deklaratës, Berisha akuzoi kryeministrin Rama për humbjen e “1 miliardë eurove të taksave të shqiptarëve”, duke përmendur disa çështje konkrete:
630 milionë euro nga marrëveshja me kompaninë CEZ;
100 milionë euro të marrë nga buxheti i shtetit për të njëjtën çështje;
200 milionë euro të inceneratorëve, të cilat sipas tij janë kryer në bashkëpunim me Arben Ahmetajn;
50 milionë euro vjedhje në tunelin e Llogarasë;
dhe kontratën e “check up”-it, që e cilësoi “vampires së shëndetit të shqiptarëve, Vilma Nushi”.
“Ku janë këto para? Ku janë 1 miliardë eurot e humbura? Këto janë taksat e shqiptarëve, të zhdukura nga qeveria më e korruptuar në historinë e vendit”, tha Berisha.
