Sipas një ankete të publikuar në medie ndërkombëtare, kujdesi shëndetësor ndaj grave në Britaninë e Madhe është krahasuar me nivelin e shërbimeve në Kosovë dhe në Kazakistan dhe thuhet se është më i dobët se kujdesi shëndetësor në Kinë.
Në bazë të një studimi të Indeksit Global të Kujdesit Shëndetësor ndaj Grave të kompanisë “Hologic”, gjendja e kujdesit shëndetësor ndaj grave në Britani është më e dobët se në Francë, në Shtete të Bashkuara dhe në Zelandë të Re.
Britania mori vetëm 60 pikë nga 100 të mundshme në këtë indeks, duke shënuar rënie për tri pikë në krahasim me vitin e kaluar. Kështu, Mbretëria e Bashkuar krahasohet me Slloveninë, Poloninë dhe Kosovën, shkruan gazeta britanike, “Evening Standard”.
Megjithatë, Britania ndodhet mbi mesataren globale prej 53 pikësh në këtë indeks. I pari është Tajvani me 70 pikë, ndërsa i fundit Afganistani me vetëm 22 pikë.
Analistët e përmendën mungesën e qasjes në kujdesin parandalues, si skanimi për kancer, dhe përkrahja për çështje të shëndetit mendor në mesin e arsyeve për rezultatin e dobët të Britanisë.
Dr. Nighat Arif, mjeke familjare që është duke specializuar për shëndetin e grave, tha: “Shoh pengesa përditë në punën time si mjeke familjare që gratë ballafaqohen me qasje në kujdesin rutinor dhe madje në masa shëndetësore parandaluese që shpëtojnë jetë, si skanimi për kancer të qafës së mitrës dhe për kancer të gjirit, që mund të shkaktojnë vonesa të panevojshme për diagnostikim dhe trajtim për gratë.
Sipas hulumtimit, gratë në Britani presin mesatarisht gati katër muaj për terminin e parë me një gjinekolog/e. Gati 38 mijë gra kanë pritur më shumë se një vit.
Një zëdhënës i Departamentit të Shëndetësisë tha: “Ne e kemi vendosur shëndetin e grave në krye të agjendës duke e publikuar Strategjinë e Shëndetit të Grave për Angli, duke e emëruar për herë të parë ambasadoren për shëndetin e grave dhe duke ndërmarrë veprime për ta rritur furnizimin e për ta ulur koston e terapisë së zëvendësimit të hormoneve.”
