Mbajtja e takimit mes kryeministrit të Kosovës, Albin Kurti, dhe presidentit të Serbisë, Aleksandar Vuçiq, ka dështuar si pasojë e vizitës së presidentit të Egjiptit në Beograd.
Ky takim i nivelit të lartë në kuadër të procesit të dialogut në Bruksel ishte paraparë që të mbahej sot, transmeton KlanKosova.tv.
E sipas agjendës së publikuar në faqen zyrtare të presidencës serbe, njeriu që u bë “pretekst” për anulimin e takimit Kurti-Vuçiq, kreu i Egjiptit, Abdel Fattah al-Sisi do të qëndrojë për vizitë zyrtare në Serbi deri më 21 korrik, njofton Klankosova.tv.
Pritja e Al-Sisit në aeroportin “Nikola Tesla” në Beograd është planifikuar për sot pasdite. Më pas, pas pritjes ceremoniale para pallatit që quhet Serbia, ku edhe do të zhvillohet takimi me Vuçiqin.
Pas ceremonisë e takimit, është paraparë takimi plenar i delegacioneve të të dyja vendeve, ceremonia e ndarjes së mirënjohjes për presidentin Abdel Fattah al-Sisi dhe do të ketë edhe firmosje marrëveshjesh.
Po, të mërkurën Vuçiq dhe Al-Sisi do të dalin në një konferencë të përbashkët për media.
Ishte kryenegociatoi i Kosovës në bisedimet me Serbinë, Besnik Bislimi ai që njoftoi të hënën se takimi mes Kurtit dhe Vuçiqit në kuadër të procesit të dialogut ka dështuar për shkak të mosgatishmërisë së këtij të fundit që të shkojë në Bruksel.
“Ideja e takimit trilateral ka qenë që të përgatitet terreni për takim të radhës mbase këtë javë, nesër në mes të krerëve të shtetit. Poashtu kjo ka dështuar për shkak të mosgatishmërisë së Vuçiqit që të shkojë në Bruksel, Kurti është deklaruar i gatshëm që sa më shpejt të fillojë diskutimi për marrëveshjen gjithëpërfshirëse, mirëpo Vuçiq ka nxjerrë si arsyetim vizitën e presidentit të Egjiptit i cili pritet të qëndrojë tri ditë në Serbi”, njofton Klankosova.tv.
Ai mes tjerash ka theksuar se Serbia po tenton të sabotojë dhe minojë procesin e dialogut.
Kurti dhe Vuçiq në kuadër të dialogut të Brukselit janë takuar vetëm dy herë, ndërsa takimin e tretë joformal e kanë pasur muaj më parë në Berlin.
Kryeqendra gjermane, Berlini, kishte bërë bashkë Kurtin dhe Vuçiqin me emisarin e BE-së për dialogun, Miroslav Lajçak më 4 maj të këtij viti në një darkë joformale ku temë ishte dialogu.
