Kreu i Lëvizjes Vetëvendosje, Albin Kurti, ka njoftuar se sot është takuar me ambasadorin e Britanisë së Madhe në Kosovë, Nicholas Abbott.
Sipas njoftimit gjatë bisedimit Kurti ka shprehur shqetësimin se Kosova ka nevojë për reforma që objektiv kanë çkapjen e shtetit dhe luftën kundër korrupsionit e krimit të organizuar.
“Për luftimin e tyre është i nevojshëm edhe koordinimi me partnerët tanë ndërkombëtar”, citohet të ketë thënë ai.
Po ashtu, gjatë bisedës, Kurti ka folur edhe për nevojën e reformimit të administratës publike dhe për përmirësimin e sistemit të degraduar shëndetësor.
Sipas tij, degradimi i mjedisit është një tjetër brengë e cila ka nevojë për planifikim më të gjerë mes institucionesh dhe politikash publike.
Në lidhje me dialogun me Serbinë, ai ka thënë se është i domosdoshëm fuqizimi i shtetit të Kosovës si kusht që një dialog kaq delikat dhe i rëndësishëm të kryhet siç duhet.
Sa i përket zgjedhjeve të 6 tetorit, u tha sesi qytetarët kanë nevojë për një proces zgjedhor të lirë dhe demokratik, me subjektet politike që fokusohen në adresimin e shqetësimeve të qytetarëve.
“Është e rëndësishme një fushatë zgjedhore pozitive që parashtron zgjidhje për të ardhmen e vendit, një fushatë e qetë dhe e mirëartikuluar që u jep mundësinë të gjithëve të votojnë të sigurtë e të qartë për të ardhmen e vendit”, thuhet në njoftim.
