Paqja në rajon është e paqëndrueshme dhe e pamundur derisa Serbia nuk kërkon falje për vrasjen e mijëra civilëve shqiptarë, zhdukjen e mbi 1600 të tjerëve, e madje edhe po vazhdon më kërcënime ndaj fqinjëve. Kështu deklaroi në diskutimin e tij kryeministri i Kosovës, Albin Kurti në konferencën për paqe në Ballkan i ftuar nga Instituti Austriak për Politikë Evropiane dhe të Sigurisë dhe Akademia Diplomatike e Vjenës.
Në fillim të diskutimit të tij, kryeministri Kurti tha se Serbia po vazhdon ta mbështesë politikën e Rusisë, ndërsa përmendi edhe plagën e të pagjeturve që po vazhdon ta rëndoj vendin.
“Ne pavarësisht këtyre jemi të gatshëm për bisedime dhe marrëveshje paqësore me Serbinë, por ajo nuk e dëshiron këtë. Në anën tjetër, derisa Serbia nuk po e pranon fajësinë për mijëra të vrarë në Kosovë, ajo po shpërblehet nga BE me miliarda euro investime dhe me marrje e statusit të vendit kandidat”, deklaroi Kurti.
Kryeministri Kurti në fillim foli për Bashkimin Evropian, si bashkësi popujsh e kulturash. Ai tha se në shekullin e kaluar pjesa më e madhe e Evropës ka qenë në konflikt, e përgjigjja ka qenë lindja e komunitetit evropian që tash quhet Bashkimi Evropian.
“Nganjëherë është lehtë të harrohet, por Bashkimi Evropian si projekt i paqes e proces historik i bashkëpunimit midis kundërshtuarve të vjetër, ka qenë vetëm pas pranimit të përgjegjësi së luftës, pas një pendimi kuptimplotë që ka çuar tek përqafimi i vërtetë i demokracisë”, tha kryeministri duke pëmednur në këtët rrafsh Serbinë, e cila kurrë nuk ka marrë përgjegjësi për krimet.
“Unë besojë që çdo gjë është e lidhur, arsyeja kryesore dhe e vetmja se pse shohim tensione në gati çdo vend të Ballkanit perëndimor, është për shkak se agresori që ka nisur të gjitha luftërat në ish Jugosllavi refuzon të marrë përgjegjësinë, në vend të pranimit të njohjes së rolit të vet, dëshiron të portretizoj dallimet në gjithë rajonin si burim i konfliktit.
Gati 24 vjet pas gjenocidit në Bosnje e Kosovë, Serbia nuk ka pranuar asnjëherë asnjë lloj krimi, nuk ka kërkuar asnjë herë falje e as nuk ka marrë përgjegjësi. Në të kundërtën lidershipi i tashëm që ka qenë në fuqi në atë kohë flet për humbje të territorit dhe i glorifikon kriminelët”, deklaroi Kurti.
Kryeministrit Kurti, ka thënë se shumë kanë pasur frikë që diçka do të ndodhte, por ajo tani ka ndodhur kur Rusia ka sulmuar Ukrainën, një vend paqësor që nuk ka bërë asgjë për t’i provokuar fqinjët e saj. Tani Kurti thtotë se edhe shteti fqinj, Serbia është ndër të rrallat shtete që nuk e ka dënuar agresionin atje.
