Kandidati për kryeministër nga Lëvizja Vetëvendosje, Albin Kurti ka folur për idenë e bashkimit kombëtar me Kosovës dhe Shqipërisë.
Kurti ka thënë në emisionin “Pressing”, në televizionin T7, se bashkimi mes dy shteteve është çështje komplekse.
“Kosova ka të drejtë t’i bashkohet Shqipërisë. Sot jemi të paaftë për t’u bashkuar. Kjo s’varet vetëm prej nesh, varet edhe prej Shqipërisë”, është shprehur Kurti.
Ai ka theksuar se si parti e konsiderojnë primare mbijetesën e shtetit të Kosovës.
Kurti ka folur edhe për çështjen e flamurit, simboleve dhe himnit të Republikës së Kosovës, i cili ka thënë se si kryeministër do t’i respektojë këto simbole shtetërore.
“Ta keni parasysh se himni e ka emrin Evropa dhe nuk ka tekst. Kjo është e çuditshme. Natyrisht që jam për që t’i shtohet tekst këtij himni, por kjo duhet të bëhet në parim me kushtetutën tonë. Si kryeministër natyrisht se do t’i respektoj. Por duhet të mbani mend se jam lider i Vetëvendosjes dhe i përfaqësoj edhe ato vlera që për ne janë të mëdha. Himni nuk është i Shqipërisë por i gjithë shqiptarëve. Si shqiptarë kemi të përbashkëta të mëdha që nga historia, flamuri e tjera. Flamuri i Kosovës nuk është as histori as një vlerë tjetër veçse gjeografike. E dimë se ka qenë gabim, por tani s’kemi arsye tjetër pos ta pranojmë”, tha ai.
