Lidhur me bisedimet që janë duke u zhvilluar mes LVV-së dhe LDK-së për krijimin e qeverisë së ardhshme, Kurti tha se janë gjithnjë e më afër, ku grupet punuese janë duke diskutuar për planifikimin të qeverisjes së ardhshme, dhe për ndarjen e përgjegjësive dhe funksioneve.
“Populli ka vendosur, që opozita e deridjeshme të jetë në qeverisje… Synimi ynë është të jetë koalicion sa më i madh në numra, por hapi i parë dhe më i madh është ai mes LVV-së dhe LDK-së”, tha Kurti për RTK dhe shtoi se për koalicionin qeverisës, punën më të madhe e ka kryer populli i Kosovës.
Lidhur me atë nëse Lista Serbe do të jetë pjesë e qeverisë Kurti, kreu i Vetëvendosjes tha se nuk është obligim kushtetues që ta kemi Listën serbe në qeveri.
“Duhet të presim deri në fund nëse do të bëhet një deputet jashtë Listës Serbe në legjislaturën e shtatë. Nuk ka obligim kushtetues që ta kemi në koalicion Listën Serbe dhe koalicioni qeveritar nuk do të jetë kurrsesi i varur nga shantazhet nga cilido krah”, tha Kurti.
