Zgjedhjet e 3 prillit në Serbi po shqetësojnë Kosovën. Kryeministri Albin Kurti, priti kancelarin austriak, Karl Nehammer, në Prishtinë, me të cilin diskutoi lidhur me nevojën e respektimit të kushtetutës dhe ruajtjen e paqes në Ballkanin Perëndimor.
“Nuk duam t’ia pamundësojmë qytetarëve të Kosovës që mund të kenë edhe pasaportë të Serbisë të drejtën e tyre të votës. Jemi optimist për rrugën përpara, mund të ketë dikush që dëshiron destabilizim, që dëshiron eksese, incidente, mirëpo këtë nuk do ta gjeni në radhët e popullit të Kosovës dhe as institucione të Republikës, jemi në kontakte me Brukselin, edhe me ambasadat e QUINT-it, me kryeqytetet kryesore evropiane, gjithashtu natyrisht Shtetet e Bashkuara të Amerikës dhe besojmë që nuk do të ketë kurrfarë problemesh dhe ata që do të mund të paramendojnë, ose larg qoftë të tentojnë, nuk do të mund të kenë sukses. Kemi nevojë për paqe në Ballkanin Perëndimor dhe dita e 3 prillit nuk besoj që të do të jetë ndryshe”, tha Kurti.
Kancelari austriak theksoi rëndësinë e ruajtjes së asaj që është ndërtuar deri më tani në Kosovë.
“Deri më 3 prill ka ende kohë, ne po shohim probleme po i trajtojmë ato, duhet të gjejmë zgjidhje për problemet, është e rëndësishme që ne, kryeministri sapo e tha, që të bëjmë gjithçka që ata të mos ta kenë të lehtë të shkatërrojnë diçka që është ndërtuar deri tani, një Kosovë e suksesshme me një perspektivë të mirë për të ardhmen”, tha Karl Nehammer, kancelar i Austrisë.
Kurti foli edhe për ndikimin që mund të ketë lufta në Ukrainë dhe në rajonin tonë, duke theksuar se Kosova është e brengosur por jo e frikësuar.
“Përshtypja ime është që presidentin rus dëshiron të ulet në tryezën e negociatave jo me presidentin Zelenski, por me presidentin Biden dhe për këtë qëllim të tij qe do t’i përngjante një lloj Jallte 2, një lloj konference të re të Jalltës, unë kam drojën që ai do ta intensifikojë luftën në Ukrainë, por edhe ta shpërndajë atë edhe diku tjetër, sepse ai nuk mund të ulet dot në tryezën e negociatave vetëm me agresionin dhe invazionin në Ukrainë. E Ballkani Perëndimor është i rrezikuar meqenëse edhe Ballkani Perëndimor ka luftë hibride”.
