“Nuk mund të bëj parashikim për të ardhmen”, kështu deklaroi kryeministri i Kosovës, Albin Kurti i pyetur nëse do t’i bënte dot ballë vendi një agresioni të mundshëm nga Serbia. Në një intervistë në KTV, Kurti tha se megjithatë, në një rast të tillë është mirë të kesh ndihmë.
“Unë veproj sipas programit tonë qeveritar, ligjit dhe Kushtetutës, nuk mund të bëj parashikime se çfarë do të ndodhë në të ardhmen. Për shembull kur ju thatë më herët që nëse sulmon Serbia, forcat tona nuk i bëjnë ballë, nuk e di a është ashtu. Unë nuk do ta kisha paragjykuar. Natyrisht që mirë është të kesh ndihmë”, tha Kurti.
Protestat e dhunshme në Veri, Kurti i ka cilësuar si “turma të shovinizmit serb”, ndërsa shtoi se ndërhyrja e Policisë erdhi pas thirrjeve për dhunë nga protestuesit serbë.
“Shkalla e rrezikshmërisë mund të thuhet që është e lartë rrotull ndërtesave të komunave. Ndërkaq, për vendbanimet e tjera në veri të Kosovës nuk ka diçka të pazakonshme. Kjo në fakt tregon që populli atje nuk është duke i bërë këto protesta, se populli bën protesta paqësore, por këto protesta janë protesta prej lart e jo prej poshtë. Duke qenë të dirigjuara e të dhunshme, në fakt nuk janë fare protesta, bëhet fjalë për turma të nacio-shovinizmit serb, të ekstremit të djathtë të cilët dëshirojnë pushtet e sovranitet që do të nënkuptonte asgjë më pak sesa nënshtrime dhe dorëzimin e Republikës demokratike. Përderisa ka turma të dhunshme e kriminale jashtë, përderisa vijnë njerëz me maska, bëjnë grafite kryqi me katër ‘S’-ja, e ‘Z’-ja e invazionit rus në Ukrainë, përderisa bërtasin për vëllazërinë e popullit serb dhe rus, përderisa kemi njerëz që hapur adhurojnë edhe Millosheviqin, edhe Putinin, natyrisht se njësia speciale duhet të jetë në ndërtesë të Komunës”, ka thënë ai.
