Pas lirimit nga burgu, ish-gjenerali i Ushtrisë Çlirimtare të Kosovës, Sylejman Selimi ka pritur në shtëpinë e tij mysafirë të shumtë nga të gjitha trevat shqiptare, përfshirë edhe figura politike.
Sot, Selimin në vendlindjen e tij e ka vizituar edhe kryetari i Lëvizjes Vetëvendosje, Albin Kurti.
Kurti këtë e ka bërë të ditur përmes disa imazheve dhe një shkrimi në llogarinë e tij Facebook.
Postimi i plotë i Kurtit:
Në vendlindjen e tij në Açarevë, sot vizitova Gjeneral lejtnant Sylejman Selimin. Ai është liruar me kusht nga burgu. Kjo disi i ngjan aq shumë gjendjes së vetë shtetit të Kosovës. Por, Syla është mirë me shëndet dhe fytyra i shkëlqente. Nga Komandant i Zonës Operative të Drenicës te Komandant i Përgjithshëm i UÇK-së te Komandant i TMK-së e i FSK-së e deri te ambasador i Republikës së Kosovës në Tiranë, kanë kaluar 20 vjet prej se e njoh dhe jemi shokë. Por, veprimtaria e tij është edhe më e hershme: ajo nis me Sylën si bashkëluftëtar i Komandantit legjendar Adem Jashari.
