Kryeministri në detyrë Albin Kurti takoi sonte zëvendës ndihmës sekretarin amerikan të Mbrojtjes David Baker, i shoqëruar nga E Ngarkuara me Punë në Ambasadën e SHBA-së në Prishtinë, Anu Prattipati, në një darkë pune të shtruar nga ministri në detyrë i Mbrojtjes, Ejup Maqedonci.
Marrëdhëniet bilaterale ndërmjet Kosovës dhe Shteteve të Bashkuara të Amerikës dhe bashkëpunimi në fushën e mbrojtjes, ishin ndër temat kyçe të diskutimit, raporton KosovaPress.
Kurti informoi Baker mbi zhvillimet dhe progresin në vend, investimet në mbrojtje dhe nevojën e rritjes së shkëmbimeve tregtare dhe shtimit të investimeve.
Ai e falënderoi Baker dhe Shtetet e Bashkuara të Amerikës për mbështetjen jetike që i kanë dhënë Kosovës dhe Forcës së Sigurisë së Kosovës, si dhe për rolin e saj të vazhdueshëm për sigurinë dhe paqen.
Kurti gjithashtu shprehu gatishmërinë e Qeverisë së Kosovës për të fuqizuar më tej raportet me SHBA-në në fushën e mbrojtjes, përfshirë industrinë e mbrojtjes.
Në këtë darkë morën pjesë edhe ministri në detyrë i Mbrojtjes, Ejup Maqedonci dhe drejtori i Agjencisë së Kosovës për Inteligjencë, Petrit Ajeti.
Kujtojmë, zyrtari i lartë amerikan David Baker gjatë vizitës së tij në Kosovë është takuar edhe me presidenten Vjosa Osmani, ministrin në detyrë të Mbrojtjes Ejup Maqedonci, kreun e KFOR-it, si dhe ka vizituar Ambasadën amerikane në Prishtinë.
