Kryeministri Albin Kurti ka folur për çështjen e tarifës dhe dallimet që kanë për këtë temë partnerët e koalicionit.
Kurti tha se ka takime të rregullta me kreun e Lidhjes Demokratike të Kosovës derisa ka bërë të ditur se për këtë temë vazhdojnë të kenë qëndrime të ndryshme.
“Po, ne kemi takime të rregullta si kryetar të subjekteve të koalicionit dhe natyrisht që synimet dhe qëllimet i kemi të përbashkëta, jemi bashkë në Qeveri. Si puna e çështjes së tarifës, ne vazhdojmë të besojmë qëkur ta kemi një dakordim për një qasje sa i përket tarifës, atëherë edhe do të mundë ta bënim vendim të Qeverisë, në mënyrë që ashtu si preferojmë ne të mos jetë një vendim pa shumicë. Nuk mund të ju them diçka të re për këtë çështje, pasi që nuk ka diçka të re”, tha kryeministri.
I pari i Qeverisë tha se derisa të ketë një qëndrim unanim në mes të LV-së dhe LDK-së, do të mbetet në fuqi taksa 100 për qind.
“Në anën tjetër, dua të konfirmoj atë që thatë ju se në mungesë të një vendimi të Qeverisë që do të vinte nga propozimi i qëndrimit para jush, gjithçka vazhdon si ka qenë deri më tani, pra ngelet taksa 100 për qind, besoj që më së miri do të ishte ta kishim zbutur këtë situatë, për të hequr tarifën 100 për qind, që ju nevojitet prodhuesve tanë”, shtoi ai.
