Mimoza Kusari-Lila, partnerja në koalicion e kryeministrit në detyrë të Kosovës, Albin Kurti, në një prononcim për mediat e ka pranuar se do të jetë e vështirë të formohet qeveria e re, vetëm me mbështetjen e komuniteteve jo-shumicë.
Sipas saj, edhe në të kaluarën bashkëpunimi me komunitetet joshumicë ka qenë formal dhe i natyrshëm, por tani Vetëvendosjes, së bashku me Alternativën e drejtuar prej saj dhe Partinë Guxo, nuk i mjaftojnë numrat.
“Edhe në të kaluarën, qeverinë ‘Kurti 2’, përkundër që e kemi pasë një shumicë me 10 deputetë më shumë, kanë filluar, domethënë, koalicioni, gjegjësisht arsyeja e lidhjes së koalicionit ose një bashkëpunimi formal ka qenë me këto parti. Me këto është edhe njëfarë forme – janë edhe vendet e garantuara edhe në Kuvend, edhe në Qeveri. Njëjtë edhe për pakicën tjetër apo komunitetin e një shumice tjetër, por gjithsesi që ka pasur trajtim në kuptimin e bashkëpunimit ose një vazhdimësie të komunikimit prej edhe mandatit të kaluar”, tha Kusari-Lila në ATV.
Ajo shtoi se në këtë mandat nuk mund të arrihet numri i nevojshëm i votave vetëm me komunitetet joshumicë dhe prandaj do të nevojiten diskutime të mëtejshme për formimin e qeverisë.
“Nuk është më e lehtë, është pak më e vështirë, qysh e kemi pa – numrat e tregojnë që vetëm me komunitetet joshumicë, si herën e kaluar, nuk ka me qenë e mjaftueshme ose nuk është e mundshme të arrihet numri 61 i minimumit që duhet për një Qeveri të votohet. Prandaj kjo është tashmë një punë e cila ka me vazhduar procesin dhe e cila ka me shty përpara gjithsesi diskutim të mëtejshëm mbi formën e mënyrën e arritjes së këtij numri”, deklaroi Kusari-Lila.
