Dhjetë të arrestuarit me urdhër të SPAK si pjesë e grupit kriminal që trafikonte kokainë nga Amerika Latine, që përpunohej në një laborator në Fushë-Krujë do të izolohen në paraburgim.
Gjykata e Posaçme pranoi kërkesën e SPAK për caktimin e masës “arrest në burg” për secilin prej tyre, duke mos marrë në konsideratë qëndrimet e mbrojtjes, për mungesë provash, apo arrestim të paligjshëm.
Në seancën që zgjati gati 5 orë, e nisur me një ndërprerje 30-minutëshe me kërkesë të avokatëve, të dyshuarit dëgjuan prokurorin Adnan Xholi t’i akuzonte si një grup i mirëstrukturuar që kishte importuar 850 lëkurë bagëtish nga Amerika Latine, 48 ton në total, të regjura me një tretësirë që përmbante sasi të lartë kokaine.
Sipas SPAK, falë ekspertizës së tre prej të arrestuarve, një kolumbiani dhe dy venezuelianëve, në laboratorin e krijuar në ambientet e një ish-mobilierie në Qerek të Fushë-Krujës, bëhej ekstraktimi i kokainës duke e kthyer në një produkt të cilësisë së lartë për tregun e narkotikëve.
Ndonëse nuk i vuri në dispozicion të avokatëve, për shkak të ruajtjes së sekretit të hetimit, prokurori pretendoi se përfshirja e të dyshuarve ishte provuar përmes përgjimit të komunikimeve telefonike mes tyre, atyre ambientale si edhe vëzhgimeve në terren.
Burime pranë seancës me dyer të mbyllura bënë me dije se të dyshuarit shqiptarë nuk dhanë deklarime në sallën e gjyqit, duke u mjaftuar me argumentet e avokatëve, që kërkuan masa më të buta dhe deklarim të paligjshëm të arrestit në flagrancë.
Ndërsa dy venezuelianët këmbëngulën para gjyqtares Irena Gjoka se po paragjykoheshin si amerikano-latinë dhe se nuk kishin asnjë lidhje me trafikun apo përpunimin e kokainës.
Njëri prej tyre pretendoi se kishte ardhur në Tiranë për mbjellje flokësh, shërbim për të cilin kishte prenotuar në një klinikë estetike në kryeqytet, ndërsa tjetri se ishte tregtar rrobash e nga këtu do të blinte rroba në Turqi. Sipas SPAK rrjeti operonte në mënyrë të sinkronizuar, me një strukturë që përfshinte shtetas nga disa qytete të vendit, role të mirë përcaktuara, financues, transportues, përpunues, dhe shpërndarës. Përveç 6 kg të kokainës të sekuestruar në laboratorin në Fushë-Krujë dhe në një vilë tek Kodra e Diellit, SPAK ende nuk ka dokumentuar sasinë e plotë të kokainës së trafikuar nga ky grup.
