Migranët do të duhet të dëshmojnë kontributin e tyre në shoqëri për të fituar të drejtën e qëndrimit të përhershëm në Britani, sipas propozimeve të reja të paraqitura nga sekretarja e Brendshme e Partisë Laburiste, Shabana Mahmood.
Në fjalimin e saj gjatë konferencës së partisë, Mahmood paralajmëroi masa të reja që synojnë reformimin e politikës së migracionit, përfshirë edhe zgjatjen e periudhës për të aplikuar për qëndrim të përhershëm nga 5 në 10 vjet.
Sipas propozimit:
- Migranët do të duhet të flasin anglisht në një nivel të lartë;
- Të kenë rekord penal të pastër;
- Dhe të kontribuojnë në komunitet përmes vullnetarizmit.
“Duam të sigurohemi që kushdo që kërkon të jetojë përgjithmonë në këtë vend, të ketë dhënë diçka mbrapsht për të,” tha Mahmood, duke shtuar se “kontributi do të jetë kusht për qëndrim të përhershëm”.
Reform UK kundër ILR, Laburistët kundër Reform UK
Deklarata e Mahmood vjen në një kohë kur Reform UK, partia e udhëhequr nga Nigel Farage, ka paralajmëruar se do të heqë plotësisht statusin e qëndrimit të përhershëm (Indefinite Leave to Remain – ILR) për të gjithë migranët – edhe ata që tashmë e kanë.
Në vend të saj, do të vendosen viza që rinovohen çdo pesë vjet, duke i detyruar edhe ata që kanë dekada në Britani të riaplikojnë vazhdimisht.
Kryeministri Keir Starmer ka reaguar ashpër ndaj kësaj politike, duke e quajtur “raciste” dhe “amorale”, ndërsa Laburistët thonë se këto masa do të shkatërrojnë jetë dhe familje që janë ndërtuar ndër vite në Britani.
Mahmood: “Nuk do ju pëlqejë gjithmonë ajo që bëjmë”
Në fjalimin e saj, Mahmood foli edhe për përvojën personale si bijë e migranëve, dhe për jetën në një dyqan familjar ku përjetoi raste vjedhjesh. Ajo tha se këto përvoja e kanë formuar si politikane dhe e kanë bërë më të vendosur në çështjet e sigurisë dhe integrimit.
Ajo paralajmëroi delegatët se në përpjekjen për të reformuar sistemin e imigracionit, nuk do të jetë gjithmonë popullore:
“Në zgjidhjen e kësaj krize, ndoshta nuk do t’ju pëlqejë gjithmonë ajo që bëjmë,” u shpreh ajo.
Kush do të përfitojë më herët?
Sipas planeve të Laburistëve, disa individë me aftësi të veçanta ose me kontribut të madh në shoqëri do të mund të përfitojnë qëndrim të përhershëm më herët se afati 10-vjeçar.
Aktualisht, rreth 4.5 milionë persona kanë statusin ILR, përfshirë mbi 430 mijë qytetarë që nuk janë nga BE.
