Lapland, vendlindja simbolike e Babagjyshit në veri të Finlandës, po kalon një valë të paprecedentë të të nxehtit, me temperatura që prej më shumë se dy javësh po qëndrojnë rreth 30°C. Në qytetin e Rovaniemit, 500 kilometra mbi Rrethin Arktik, edhe vetë Babagjyshi është detyruar të bëjë thirrje për kujdes ndaj rrezikut të goditjes nga dielli.
“Sigurohuni që drerët të kenë ujë mjaftueshëm dhe mos harroni të pini një gotë çdo orë”, i këshillon ai elfët e tij që janë të zënë duke përgatitur dhuratat për Krishtlindjet e ardhshme. Ndërkohë vetë Babagjyshi del vetëm në mbrëmje për një not në liqen, kur temperaturat bien disi. “Kostumi im i trashë është tepër i ngrohtë për këtë vapë”, thotë ai.
Sipas Institutit Meteorologjik Finlandez, valët e të nxehtit në Lapland janë një dukuri shumë e rrallë. Meteorologu Jaakko Savela thekson se kjo është vala më e gjatë e të nxehtit në rajon që nga viti 1972, atëherë zgjati 12 deri në 14 ditë, por këtë vit pritet të tejkalojë 15 ditë.
Temperatura më e lartë e regjistruar deri tani ka qenë 31.7°C në Ylitornio dhe Sodankylä, rreth 10°C mbi mesataren sezonale për Laplandën. Në fshatin e Babagjyshit, termometri në diell ka shënuar madje edhe 33°C.
Ndërsa kjo valë specifike e të nxehtit nuk lidhet drejtpërdrejt me ndryshimet klimatike, ekspertët theksojnë se pa ndikimin e klimës, temperaturat do të kishin qenë ndjeshëm më të ulëta.
Profesori Jeff Weller nga Universiteti i Oulus, i cili është edhe kryetar i Kërkimeve për Universitetin e Arktikut, thotë: “Tani çdo ditë në botë është e prekur nga gjurmët e ndryshimeve klimatike, qoftë në formën e të nxehtit ekstrem apo reshjeve të rrëmbyeshme”. Sipas tij, valët e të nxehtit si kjo do të bëhen më të shpeshta dhe më intensive në të ardhmen.
Ndikimi nuk po ndjehet vetëm te njerëzit. Drerët, që zakonisht lëvizin të lirë në pyje dhe male, po tërhiqen drejt fshatrave dhe rrugëve për t’u shpëtuar mizave dhe mushkonjave që shumohen me shpejtësi në të nxehtë. Disa studiues madje parashikojnë se në të ardhmen mund të jetë e nevojshme ndërtimi i strehimoreve të mëdha për ta siguruar hije për këto kafshë arktike.
Turistët që zakonisht zgjedhin Laplandën për të ikur nga vapës verore, këtë vit janë gjetur të papërgatitur. Ndërkohë, Babagjyshi vazhdon punën në hije dhe pret orët e vona të ditës për të dalë jashtë, përndryshe rrezikon goditje nga të nxehtit për vetëm 10 minuta. “E kuptoj që një verë e nxehtë mund të jetë e këndshme për disa, por unë preferoj të ftohtin dhe borën. Dimri është më i mirë”, përfundon ai me buzëqeshje.
