Marrëveshja e arritur në fundjavë mes presidentit serb Aleksander Vuçiç dhe kryeministrit Albin Kurti përfaqëson një pikë kthese në procesin e normalizimit të marrdhënieve mes dy vendeve.
Kështu mendon i dërguari i posaçëm i Bashkimit Europian për dialogun, Miroslav Lajçak, në një intervistë për Radion Evropa e Lirë dhe Euroneësin serb. Ai thotë se marrëveshja e Ohrit është e detyrueshme dhe se palët duhet të zbatojnë të gjitha pikat e saj.
“Preferenca jonë, si lehtësues të BE-së, ka qenë që dokumenti të nënshkruhet. Presidenti Vuçiç e ka bërë mjaft të qartë se nuk është në pozicion për ta nënshkruar këtë dokument. Ne kemi bërë përsëri disa propozime se si të trajtohet çështja, por ato janë refuzuar. Në fund, kemi rënë dakord që ky dokument të formalizohet përmes njoftimit të Përfaqësuesit të Lartë Borrell, gjë që ka ndodhur të shtunën. Kjo është plotësisht në përputhje me praktikën juridike ndërkombëtare. Pra, kjo do të thotë se ky dokument është i detyrueshëm, është zyrtar, është formal”, tha Lajçak.
Lajçak thekson se pjesë e detyrimeve që burojnë nga pranimi i marrëveshjes është neni 4 që i kërkon Serbisë të mos e kundërshtojë anëtarësimin e Kosovës në asnjë organizatë ndërkombëtare, ndërsa Kosova sipas tij ka detyrim të fillojë menjëherë me formimin e Asociacionit të komunave me shumicë serbe në Kosovë.
“Dua të jem i qartë, Neni 7 nuk përfshin zotime të reja për Kosovën. Neni 7 flet për nevojën e zbatimit të asaj për të cilën Kosova dhe Serbia veçse janë pajtuar. Kjo nënkupton marrëveshjet e viteve 2013 dhe 2015, që flasin që themelimin e një lloj asociacioni të komunave me shumicë serbe. Përndryshe, kjo do të nënkuptonte Nenin 10, që thotë se të gjitha marrëveshjet e mëparshme, plus Nenin 7, pra aranzhime shtesë, që nuk do të kishte logjikë”.
Ai e pranoi se BE kishte një plan më ambicioz: nënshkrimin e Marrëveshjes për normalizim dhe një draft-aneks me afate kohore dhe detyra të qarta. Por palët nuk ranë dakord për të gjitha pikat dhe se propozimi kishte ndryshuar. Kryeministri Albin Kurti tha të martën se presidenti serb e kishte refuzua ofertën e tij për vetë menaxhim të serbëve të Kosovës në një asociacion, ndërsa i kërkoi komunitetit ndërkombëtar të dënojë Vuçiç për mosnënshkrim të ujdisë. Vuçiç sakaq, sfidoi me herët ndërkombëtarët duke thënë se do të zbatojë vetëm pikat që nuk shkelin vijat e kuqe.
