Lidhja Demokratike e Kosovës fton të gjitha partitë politike që të mbështesin idenë për një qeveri gjithëpërfshirëse kalimtare, si rruga më e mirë për të dalë nga ngërçi politik, për shkak të mos konstituimit të legjislativit të nëntë, pasi Lëvizja Vetëvendosje, Guxo e Alternativa nuk kanë votat e mjaftueshme për zgjedhjen e Albulena Haxhiut kryetare e re e Kuvendit.
Kryetari i Lidhjes Demokratike të Kosovës, Lumir Abdixhiku mori pjesë sot në takimin e thirrur nga presidentja Vjosa Osmani, në përpjekjen për të gjetur zgjidhje për të dalë nga kriza politike dhe institucionale tremujore e vendit.
Lidhja Demokratike e Kosovës e konsideron obligim politik, moral dhe kushtetues të paraqesë qartazi vizionin dhe qëndrimin politik për tejkalimin e krizës aktuale, për të cilën thotë se ka ardhur si pasojë e paaftësisë së Lëvizjes Vetëvendosje për të krijuar shumicën parlamentare.
Çdo përpjekje për të funksionalizuar institucionet pa një shumicë të tillë nuk është tjetër veçse përpjekje për të imponuar arbitrarisht dëshira politike partiake mbi realitetin politik. Së këndejmi, insistim kokëfortë dhe me vetëdije për të përsëritur procesin e dështuar për zgjedhjen e kryetarit të Kuvendit për herën e gjashtëmbëdhjetë, nuk jep asnjë zgjidhje, thuhet në një deklaratë.
Lidhja Demokratike e Kosovës vlerëson se gjendja e tanishme nuk mund të vazhdojë deri në pafundësi duke thënë se çdo vonesë në ndërtimin e institucioneve, është dëm për interesin e qytetarëve dhe cenon rëndë rendin kushtetues.
Me qëllim të zgjidhjes së krizës, Lidhja Demokratike e Kosovës ka dhënë propozimin për krijimin e një qeverie gjithëpërfshirëse kalimtare, me mandat dhe detyrime të përcaktuara qartë.
Kryesia e Lidhjes Demokratike të Kosovës vlerëson se propozimi i kësaj partie për zgjidhjen e krizës është më i përshtatshmi dhe i shërben interesit të vendit
