Teksa Shtetet e Bashkuara kërkojnë ekstradimin e Ovidio Guzmán López dhe gjuetia për arrestimin e 3 djemve të tjerë të El Chapo-s, mbretit famëkeq meksikan të drogës, është shtuar ndjeshëm, avokati i 4 vëllezërve ka publikuar një letër të tyre, ku pretendojnë se ata nuk janë udhëheqësit e kartelit të Sinaloas, në të cilën babai i tyre ishte bashkëthemelues.
Një letër e katër vëllezërve dhe motrës së tyre u publikua në gazetën meksikane “Milenio”. Iván Archivaldo Guzmán Salazar, Jesús Alfredo Guzmán Salazar, Ovidio Guzmán López dhe Joaquín Guzmán López, të njohur ndryshe se “Los Chapitos”, iu drejtuan mediave për herë të parë me një mesazh të dërguar nga avokati i tyre.
Ata thonë se pretendimet se janë drejtues të kartelit të themeluar nga El Chapo dhe Ismael ‘El Mayo’ Zambada, i cili nuk është arrestuar kurrë, janë sajesa. “Ne nuk jemi në krye të kartelit të Sinaloas dhe as nuk na intereson. Ka një numër ta madh grupesh që janë të vendosura në këtë shtet dhe përbëhen nga njerëz nga Sinaloa. Ata veprojnë në shtete të tjera të vendit, madje edhe në pjesë të tjera të botës. Këto grupe funksionojnë plotësisht të pavarura nga njëri-tjetri, nuk na japin llogari dhe as nuk i kërkojmë llogari”, thuhet ndër të tjera në letër.
Iván Archivaldo Guzmán Salazar dhe Jesús Alfredo Guzmán janë në kërkim nga Shtetet e Bashkuara të Amerikës dhe për ta ofrohen nga 10 milionë dollarë shpërblim për ata që janë informacione. Ndërkohë, 5 milionë dollarë jepen edhe për Joaquín Guzmán López. Ndërkohë, Ovidio Guzmán López ndodhet në një burg në Meksikë dhe po lufton me drejtësinë vendase që të mos ekstradohet në Shtetet e Bashkuara të Amerikës.
Sipas prokurorëve në Amerikës, nën udhëheqjen e djemve të El Chapo, karteli i Sinaloa mbetet një nga organizatat kriminale më të fuqishme në botë dhe është përgjegjës për importimin e fentanilit në Shtetet e Bashkuara. Kjo drogë sintetike konsiderohet 50 herë më e fortë se heroina dhe është bërë shkaku kryesor i vdekjes së shumë të rinjve amerikanë.
Djemtë e El Chapo i mohuan akuzat, por pranuan se ka persona të tjerë që prodhojnë dhe trafikojnë drogën sintetike dhe u bënë thirrje autoriteteve për të hetuar nga më shumë se një agjent që të zbulohet e vërteta. “Ne nuk kemi punuar kurrë me fentanilin. Megjithatë, në Sinaloa ka shumë që punojnë me të. Hetoni! Ne kurrë nuk kemi krijuar marrëdhënie me persona që trafikojnë fentanilin”.
Ata kundërshtojnë edhe akuzat e ngritura nga DEA se janë të përfshirë në përplasje të armatosura me grupe të tjera rivale. “Kurrë nuk jemi futur në luftë me grupin Los Zetas. Ata nuk mund të na akuzojnë se ne kemi marrë pjesë në vrasjen e anëtarëve të këtij grupi”, thuhej në letër.
