Newcastle United ka arritur një marrëveshje me Stuttgart për transferimin e sulmuesit gjerman Nick Woltemade për shumën prej 70 milionë £, duke përfshirë edhe 5 milionë në formë bonusesh.
Lojtari 23-vjeçar pritet të kryejë vizitat mjekësore të premten në mëngjes në Tyneside.
Ky transferim pritet t’i hapë rrugë largimit të Alexander Isak drejt Liverpoolit, pas javësh tensionesh dhe refuzimesh të njëpasnjëshme nga ana e Newcastle.
Woltemade, që ka regjistruar 17 gola në 33 ndeshje sezonin e fundit me Stuttgart dhe ka dy paraqitje me përfaqësuesen e Gjermanisë, ishte gjithashtu në radarin e Bayern Munich gjatë kësaj vere, por është Newcastle që ka fituar garën për firmën e tij.
Për trajnerin Eddie Howe, ky është një lehtësim i madh pas një merkatoje të vështirë ku Newcastle ka hasur refuzime nga emra si Liam Delap, Hugo Ekitiké, João Pedro dhe Benjamin Šeško. Ndërkohë, Alexander Isak ka refuzuar të stërvitet apo të luajë, duke shtuar presionin mbi klubin për të gjetur një zëvendësues të denjë.
Sipas burimeve pranë klubit, një ofertë e dytë nga Liverpool për Isak është e pritshme. Oferta e parë prej 110 milionë £ është refuzuar, por një propozim që i afrohet 130 milionë £ mund të mjaftojë për ta bindur Newcastle të heqë dorë nga sulmuesi suedez.
Ndërkohë, Callum Wilson është larguar drejt West Ham, dhe situata rreth Isak mbetet e paqartë. Kjo ka bërë që Howe të mbetet ende në kërkim të të paktën edhe një sulmuesi tjetër.
Newcastle ka pasur një ofertë të dytë prej 55 milionë £ të refuzuar nga Wolves për Jørgen Strand Larsen, ndërsa bisedimet për Yoane Wissa të Brentford vazhdojnë. Sipas raportimeve, Wissa ka shprehur dëshirën për t’u transferuar në St James’ Park, por negociatat mbeten të ndërlikuara.
