Propozimi për procesin e liberalizimit të vizave për Kosovën, është hequr nga agjenda e ambasadorëve të vendeve të Bashkimit Evropian, për ditën e sotme.
“Tema u hoq nga rendi i ditës së COREPER (Ambasadorëve) sot”, thuhet nga Presidenca Çeke për Klankosova.tv.
Klan Kosova nga burime ka mësuar se kjo vjen pas zhvillimeve të fundit në veri të vendit për targat.
Ndonëse, zyrtarisht për Klankosova.tv është thënë se çështja e liberalizimit të vizave për Kosovën është në procedurë të brendshme të Këshillit Evropian, si dhe është bërë thirrje për ulje të tensioneve në veri të Kosovës.
“Bëjmë thirrje për ulje të tensioneve të menjëhershme të situatës aktuale në Kosovë në lidhje me targat e veturave”, thanë nga Presidenca e Çekisë për Klankosova.tv.
Në një postim në Twitter të Presidencës Çeke të BE-së shihet se pjesë e agjendës nuk është liberalizimi i vizave për kosovarët, njofton Klankosova.tv.
Ndërkohë, dje ekskluzivisht për Klankosova.tv nga ky institucion evropian kanë deklaruar se janë afër një kompromisi për liberalizimin e vizave.
“Jemi shumë afër një kompromisi në Këshillin e Bashkimit Evropian për çështjen e liberalizimit të vizave për Kosovën. Data me të cilën punojmë është aktualisht 01.01.2024”, thuhet në deklaratën për Klankosova.tv.
Dje në Bruksel është mbajtur edhe një takim i Grupit Punues për Vizat në kuadër të Këshillit të Bashkimit Evropian. Kjo është hera e tretë që Grupi Punues për Viza brenda një muaji diskutoi për heqjen e regjimit të vizave për shtetasit e Kosovës për në Zonën Schengen, njofton Klankosova.tv.
