Liderët separatistë të Katalonjës, Carles Puigdemont dhe Antoni Comini, kanë siguruar të premten akreditimet e përkohshme si pjesëtarë të Parlamentit Evropian, vetëm një ditë pasi që gjykata më e lartë e Bashkimit Evropian mori vendim në favor të tyre.

Duke mos qenë në gjendje që t’i marrin më herët këto kredenciale shkaku i frikës se mund të arrestoheshin në Spanjë, dy liderët, të cilët aktualisht jetojnë në ekzil në Belgjikë, duhet që të pajisen me akreditime të plotfuqishme më së voni deri në janar, ka thënë zëdhënësja e Dhomës.

Vendimi është produkt i verdiktit të lëshuar të enjten nga Gjykata e Drejtësisë e Bashkimit Evropian (CJEU), në të cilin thuhet se lideri i burgosur separatist, Oriol Junqueras, kishte imunitet si një deputet i PE-së, pasi që u zgjodh për këtë post në zgjedhjet evropiane të majit.

Puigdemont dhe Comin po ashtu kanë siguruar poste në Parlamentin Evropian, por nga frika e kthimit në Spanjë, ku ata përballen me fletarrestime, ua ka pamundësuar dhënien e betimit dhe marrjen e kredencialeve si eurodeputetë, raporton Reuters, transmeton Koha Ditore.

“Aktualisht jemi në vendin ku do të duhej që të ishim rreth gjashtë muaj më herët”, ka thënë Puigdemont, duke folur para gazetarëve në selinë e Parlamentit Evropian, ku ai dhe Comin i morën akreditimet.

Ish-kryetari i qeverisë rajonale të Katalonjës ka thënë se shpreson që të marrë pjesë në seancën e ardhshme parlamentare, ndërsa e kritikoi gjyqësorin spanjoll, për të cilin bëri të ditur se tanimë nuk është i pavarur dhe nuk mund të garantojë mbrojtjen e të drejtave të tyre.

Shteti spanjoll ka lëshuar një fletarrestim ndërkombëtar ndaj Puigdemontit, shkaku i rolit të tij në përpjekjen e dështuar të 2017-s për shpalljen e pavarësisë së Katalonjës. Fletarrestimi aktualisht është duke u shqyrtuar nga autoritetet belge. Ai ka shtuar se dëshiron që ta vizitojë Katalonjën sa më parë që është e mundur, porse është ende tepër herët të thuhet se kur kjo gjë mund të ndodhë.

Gjykata më e lartë e BE-së ka njoftuar të premten se një gjykatë më e ulët e bllokut evropian duhet ta rishqyrtojë kërkesën e Puigdemontit dhe Cominit për t’i zënë vendet e tyre si ligjvënës evropianë, duke u bazuar në vendimin e marrë rreth rastit të Junquerasit, pasi që gjykata më e ulët e kishte refuzuar kërkesën e tyre në qershor.

Junqueras është dënuar me 13 vjet burgim gjatë tetorit, për rolin e tij në organizimin e referendumit të pavarësisë së Katalonjës, të cilën gjykatat spanjolle e kishin shpallur të paligjshëm. Ai u zgjodh eurodeputet teksa ende po e priste verdiktin nga drejtësia në Madrid.