Gjatë vizitës në Prishtinë, Ali Ahmeti foli dhe për çështjen e ligjit të gjuhës shqipe në Maqedoninë e Veriut dhe nuk la pa përmendur dhe kryeministrin e Kosovës, Albin Kurti i cili tha pak kohë më parë se nuk ka një ligj për shqipen në RMV.
“Gjykata Kushtetuese nuk është e kapur nga asnjë parti politike në opozitë. Të gjitha propozimet dhe kryetari i Gjykatës është propozim i Ivanov. I kam dëgjuar edhe unë dhe parti opozitare dhe ato që duan të përfaqësojnë shqiptarët se gjoja se ligji nuk është adekuat se nuk ka ligj për gjuhën shqipe. Kanë manipuluar dhe kryeministrin e Kosovës, dëshiroj të jetë manipuluar dhe të mos ketë bindje që shqipja nuk ka qenë RMV. Shqipja është zyrtare e sanksionon kushtetuta, marrëveshja e Ohrit”, tha Ahmeti.
Kreu i BDI ftoi kritikët e ligjit që ta avancojnë atë aktual dhe në diplomacinë e jashtme të RMV, por të mos e rrezikojnë pasi për të kanë dhënë jetën shumë shqiptarë.
“Nëse janë patriotë të bëjnë një avancim që shqipja të jetë dhe në diplomacinë e jashtme. Nuk ka gjuhë të parë dhe të dytë. Ka dy gjuhë në RMV. E vetmja që i mungon shqipes është përdorimi në politikën e jashtme, në ambasada. Mos e rrezikojnë ligjin e gjuhës pasi është larë me gjakun e djemve më të mirë të shqiptarëve të RMV”, tha Ali Ahmeti për A2 CNN.
