Ish-ministri i Mjedisit, Lefter Koka është liruar nga burgu këtë të enjte, rreth 4 vite pas arrestimit të tij. Mësohet se Gjykata e Posaçme ka lënë të lirë Kokën pasi rezulton se janë djegur të gjitha afatet e paraburgimit për çështjen e inceneratorit të Fierit.
GJKKO ka shuar masën e sigurisë “arrest me burg” për inceneratorin e Fierit, ndërsa çështja është kthyer për rigjykim në Apelin e Posaçëm nga Gjykata e Lartë.
Koka u arrestua në dhjetorin e vitit 2021. Ish-minsitri i Mjedisit është akuzuar shpërdorim detyre, korrupsion dhe pastrim parash lidhur me aferat korruptive për inceneratorin e Elbasanit, Tiranës dhe Fierit.
Sa i takon dënimit me 6.8 vite burg për inceneratorin e Elbasanit, Koka ka fituar lirinë me kusht nga Gjykata e Durrësit ndërsa dënimin me 2 vite burg për inceneratorin e Tiranës, ish-ministri e ka shlyer në kohën e qëndrimit në paraburgim.
Sakaq, në dosjen e SPAK për inceneratorin e Fierit nënvizohet se janë paguar 4 milionë euro për punë që nuk janë kryer kurrë. Po ashtu dëmi i shkaktuar në buxhetin e shtetit përmes kësaj skeme mashtrimi është 60 milionë lekë.
