Liverpooli ka shënuar fitoren e nëntë në sezonin e ri duke e mposhtur Tottenhamin në Anfield, në kuadër të xhiros së dhjetë të Premier Ligës.
Fitoren 2 me 1, “Të Kuqtë” e arritën me përmbysje të rezultatit. Harry Kane realizoi për Tottenhamin qysh në minutën e parë. Liverpooli u kthye me dy gola në pjesën e dytë. Jordan Henderson e Mohamed Salah shënuan në minutat 52 dhe 73 për fitoren e ekipit të Jurgen Kloppit.
Në tabelë, Liverpooli mbetet lider me 28 pikë, gjashtë pikë para Manchester Cityt që e ndjek. Tottenhami në anën tjetër është i 11-i me 12 pikë.
