Një nga sulmuesit më të mirë të futbollit modern, Harry Kane, ka folur hapur i pyetur nga gazetarët për një rikthim të mundshëm në Angli, edhe pse i ka dalë mjaft mirë te Bayern Munichu që në fillim.
Nëse ai nuk do të kishte mbetur pa një trofe sezonin e kaluar, kalimi i Kane në Bayern do të ishte një hit absolut. Ai theu të gjitha rekordet e mundshme për shënimin e golave dhe efikasitetin nëse kemi parasysh periudhën në klub dhe këtë vit duhet të fitojë edhe trofeun e tij të parë – titullin kampion gjerman.
Megjithatë, duket qartë se futbollistët anglezë nuk kanë qëndruar asnjëherë gjatë në Gjermani, e lëre më golashënuesi më i mirë në historinë e Anglisë, ndaj pritet edhe rikthimi i tij në vendlindje.
Mediat në ishull raportuan se Kane dëshiron të kthehet së shpejti në Ligën Premier dhe se Liverpooli është i pari në radhën e kandidatëve për ta sjellë atë. Kjo do t’i lejonte Reds të zëvendësonin Darwin Nunez, i cili pas një transferimi të madh nuk iu afrua as të përmbushte pritshmëritë.
Lajmi për dëshirat e Kane ishte aq i madh saqë i shtyu gazetarët e ESPN ta pyesnin për planet e tij.
Edhe pse golashënuesi më i mirë në historinë e kombëtares angleze konfirmoi se është i lumtur në Bayern, ai nuk donte të mbyllte derën për një rikthim në Angli, dhe kjo të paktën është e qartë.
“Unë nuk jam i sigurt për të ardhmen time dhe rikthimin në Angli. Unë kam thënë gjatë gjithë karrierës sime se nuk jam dikush që më pëlqen të mendoj përpara. Jam jashtëzakonisht i lumtur këtu”, deklaroi Kane.
“Mendoj se kemi një ekip fantastik, trajnerë të mëdhenj dhe ndjej se ky është vendi më i mirë ku mund të jem dhe ku dua të luaj derisa jam në më të mirën time. Megjithatë, shumë mund të ndryshojnë në një periudhë të shkurtër kohe dhe gjërat mund të ndodhin”.
“Fokusi im aktual është këtu dhe nuk po mendoj për ndonjë klub tjetër për momentin”, shtoi anglezi.
Kane është në një nivel joreal edhe këtë sezon dhe tashmë ka shënuar 33 gola dhe deri në 10 asistime te gjiganti gjerman.
