Liverpooli ka siguruar kalimin në fazën nokaut të Ligës së Kampionëve, pas fitores 1:0 që e shënoi sonte në shtëpi ndaj Ajaxit.
Curtis Jones (58’) realizoi golin e fitores për Liverpoolin në ndeshjen që u zhvillua në “Anfield Road”.
Ndeshja i takoi Grupit D. Pas pesë xhirove Liverpooli zë vendin e parë në Grupin D me 12 pikë, katër më tepër se Atalanta që zë vendin e dytë dhe pesë më tepër se Ajaxi që është i treti. Midtjyllandi zë vendin e fundit me një pikë.
Atalanta barazoi sonte 1:1 në shtëpi me Midtjyllandin. Alexander Scholz (13’) realizoi golin e epërsisë për Midtjyllandin, ndërsa i barazoi shifrat Cristian Romero (79’) për Atalantan.
Berat Gjimshiti ka qenë titullar te Atalanta dhe luajti tërë ndeshjen, ndërsa u ndëshkua edhe me karton të verdhë.
Në Grupin B, situata ka mbetur e hapur. Shakhtar Donetzku e ka befasuar Real Madridin, duke e mposhtur në Ukrainë me rezultatin 2:0, ndërsa Borussia Moenchengladbachu pësoi 3:2 në shtëpi nga Interi.
Një xhiro pa përfunduar faza grupore, kryeson Gladbachu me tetë pikë, një më tepër se Shakhtari e Real Madridi, Interi është i fundit me pesë pikë.
