Liverpooli është kualifikuar në fazën nokaut të Ligës së Kampionëve. Në fakt, skuadra angleze e kishte siguruar kualifikimin më herët, kurse të martën mbrëma shënoi fitore edhe në duelin e fundit kundër Milanit në “San Siro” me rezultatin 2:1.
Klubi anglez preku një rekord pas triumfit ndaj ekipit italian, duke arritur fitoren e gjashtë në po aq ndeshje të fazës së grupeve. Liverpooli është bërë skuadra e parë angleze që arrin gjashtë fitore në fazën e grupeve. 18 gola të realizuar dhe 10 të pranuar, ishte bilanci i skuadrës së trajnerit Jurgen Klopp.
Për Kloppin si trajner, ishte hera e parë që është përballur me Milanin në “San Siro”. Po ashtu, Liverpooli është klubi nga Anglia që ka më së shumti tituj të Ligës së Kampionëve, gjithsej gjashtë.
