Mesfushori kosovar, Përparim Hetemaj, është i dyti në listën e lojtarëve më të fauluar prej vitit 2010 e tutje, ka shkruar “goal.com” të hënën.
Më shumë se futbollisti i Beneventos është fauluar vetëm Eden Hazard. Sajti i njohur, “goal.com”, versioni në gjuhën italiane, ka shkruar se lojtarët si Neymar, Cristiano Ronaldo, Lionel Messi janë vazhdimisht në fokusin e lojtarëve mbrojtës, dhe rrjedhimisht prej më të fauluarve. Por në dhjetëshen e parë qëndron edhe Përparim Hetemaj, “futbollisti që është mësuar të luftojë prej moshës së re”.
“Hetemaj nuk shënon shumë, nuk jep asiste, por është vazhdimisht në dispozicion, është në çdo pjesë të fushës”, ka shkruar “goal.com”.
Hetemaj luan në Itali prej vitit 2010. Një edicion luajti për Brescian, ndërsa prej vitit 2011 deri në vitin 2019 ishte te Chievo. Këtë edicion po luan për Beneventon në Serie B.
“Këmbët e tij janë vazhdimisht të rrezikuara. Më tepër se Messi, Neymar e Cristiano Ronaldo. Vetëm Hazard, në top-ligat evropiane, në dhjetë vitet e fundit është fauluar më shumë. 1035 faula janë bërë ndaj Hazardit, ndërsa 797 ndaj Hetemajt. Messi është fauluar 724 herë, Ronaldo 643 herë, Neymar 656 herë”.
