Britania e Madhe tha sot se synon një marrëveshje të tregtisë së lirë postBrexit me BE-në sa më shpejt të jetë e mundur, pas vlerësimit të Francës se negociatat mund ta kalonin afatin e 31 tetorit të vendosur nga europianët.
Pas një jave bllokimi, BM dhe BE rinisën diskutimet e tyre me shpresën për të arritur një marrëveshje, ndërsa po afron fundi i periudhës së tranzicionit postBrexit, më 31 dhjetor.
“Ne duam të arrijmë një marrëveshje mbi bazën e asaj që kemi përcaktuar, sa më shpejt të jetë e mundur”, tha një zëdhënës i Boris Johnson.
“Ne kemi qenë të qartë në ambiciet tona për negociatat. Duam të arrijmë një marrëveshje të tregtisë së lirë e cila na respekton si një komb sovran”, shtoi ai.
Deri më tani, europianët kanë thënë se kompromisi duhej gjetur deri në fund të tetorit, në mënyrë që ai të miratohej në kohë për në fund të vitit.
Në rast të një “no deal”, tregtia midis BM dhe BE do të rregullohet nga kushtet e Organizatës Botërore të Tregtisë dhe do të jetë subjekti i kuotave dhe detyrimeve doganore.