Gjenerali Sir Patrick Sanders u bën thirrje anëtarëve të NATO-s përpara takimit të tyre të 75-vjetorit në Uashington, që të fokusohen në riarmatosje, për të paraprirë një kërcënim që vjen nga ato që ai i quan fuqitë e boshtit të ri: Rusia, Kina dhe Irani.
Sipas Sanders – që shërbeu si Shef i Shtabit të Përgjithshëm të Ushtrisë Britanike, deri muajin e kaluar – bota po përballet me një nga momentet më të rrezikshme që nga viti 1945 dhe brenda pesë viteve të ardhshme, një Luftë e Tretë Botërore mund të shpërthejë, nëse veprimet nuk do të ndërmerren.
Ai argumenton se boshti i ri përbën një kërcënim edhe më të madh se nazistët në vitin 1939. “Nëse marrim hapat e duhur tani, nëse plotësojmë boshllëqet që kemi, nëse modernizojmë forcat tona të armatosura dhe nëse e bëjmë shoqërinë më elastike, mund ta parandalojmë luftën. Nëse nuk e bëjmë, kjo rrit probabilitetin dhe inkurajon Rusinë, Kinën dhe Iranin”, u shpreh ai.
Anëtarët e NATO-s do të takohen në Uashington, këtë javë, për të shënuar 75-vjetorin e formimit të aleancës, duke përfshirë kryeministrin e ri të Mbretërisë së Bashkuar, Sir Keir Starmer.
